რეალ მადრიდში დიდი ცვლილებები დაანონსდა. კარლო ანჩელოტი სეზონის ბოლოს გუნდს 100% დატოვებს და თუ ყველაფერი გეგმის მიხედვით წავა, სამეფო კლუბს ჩაბი ალონსო ჩაიბარებს. მხარეები მოლაპარაკებებს აგრძელებენ და საკმაოდ დიდია იმის ალბათობა, რომ შეთანხმება უახლოეს კვირებში შედგება.
რაც შეეხება ზაფხულის სატრანსფერო გეგმებს, რეალ მადრიდი ტრენტ ალექსანდერ-არნოლდის გარდა, მინიმუმ 2 ფეხბურთელის დამატებას გეგმავს. განიხილება მარცხენა მცველისა და ცენტრალური ნახევარმცველის ტრანსფერები. როგორც დადასტურდა, კლუბში ძალიან მოსწონთ მილოშ კერკეზისა და ალექსის მაკ ალისტერის კანდიდატურები, თუმცა ზაფხულის სატრანსფერო ფანჯრის მოახლოებასთან ერთად მოსალოდნელია, რომ სხვა ფეხბურთელების მიმართაც დადასტურდება ინტერესი.
რაც შეეხება წამსვლელებს, საკმაოდ დიდი შანსია გუნდი გამოცდილმა ფეხბურთელებმა ლუკა მოდრიჩმა და ლუკას ვასკესმა დატოვონ. კლუბი ამ ფეხბურთელებს ახალ ხელშეკრულებებს ამ დრომდე არ სთავაზობს, შესაბამისად, საკმაოდ დიდია იმის ალბათობა, რომ ისინი სამეფო კლუბს ზაფხულში დატოვებენ.
უახლოეს ერთ თვეში რეალ მადრიდთან დაკავშირებით უფრო მეტი ინფორმაცია გახდება ცნობილი. მადრიდულ გრანდს დატვირთული ზაფხულის სატრანსფერო ფანჯარა არ ელოდება, თუმცა კლუბი საკუთარ გულშემატკივრებს რამდენიმე საინტერესო გარიგებას მაინც ჰპირდება.
