რეალ მადრიდი ჩემპიონთა ლიგას სულ რამდენიმე საათის წინ დაემშვიდობა. სამეფო კლუბი ორი მატჩის ჯამში არსენალთან 5-1 განადგურდა და მომდევნო ეტაპზე გასვლა ვერ მოახერხა. ამ მატჩის დასრულებიდან ამ წუთამდე, ესპანური პრესა მხოლოდ და მხოლოდ რეალ მადრიდზე საუბრობს.
რა ხდება რეალურად რეალ მადრიდში?
პირველ რიგში კარლო ანჩელოტიზე უნდა ვისაუბროთ, რომელიც დიდი შანსია სანტიაგო ბერნაბეუზე ბოლო სეზონს ატარებდეს. იტალიელი სპეციალისტის გარშემო საუბრები არ წყდება, მეტიც, ბევრი გამოცემის აზრით, იტალიელი სპეციალისტი ესპანეთის თასის ფინალის შემდეგ რეალს დატოვებს. ამ ინფორმაციას ბევრი წყარო არ ადასტურებს, თუმცა ყველა ერთ რამეზე თანხმდება — ცვლილებები საჭიროა და თუ ყველაფერი გეგმის მიხედვით წავა, ზაფხულში გუნდი მთავარ მწვრთნელს შეიცვლის. ჩაბი ალონსოზე საუბრები კი ყოველდღიურად იმატებს... ლევერკუზენის თავკაცი ფლორენტინო პერესის #1 სამიზნედ რჩება!
ამასობაში კიდევ ერთხელ გააქტიურდა ბრაზილიის ფეხბურთის ფედერაცია, რომელიც კარლო ანჩელოტის სიტუაციას ყურადღებით აკვირდება. "სელესაოს" შეთავაზება იტალიელ სპეციალისტს მაგიდაზე უდევს და თუ მისი მადრიდული ისტორია უახლოეს კვირებში დასრულდება, ბრაზილიელები საქმის ბოლომდე მიყვანას შეეცდებიან.
რაც შეეხება ფეხბურთელებს — როგორც ესპანეთში იწერება, ფლორენტინო პერესი ზაფხულში გუნდის სერიოზულ გადახალისებას გეგმავს. რეალი შეიძლება ისეთმა ფეხბურთელებმაც კი დატოვონ, რომლებიც ახლა გუნდის ლიდერებად ითვლებიან. ფაქტია, სამეფო კლუბში მიხვდნენ, რომ ცვლილებები საჭიროა და ეს მხოლოდ მთავარ მწვრთნელს არ ეხება. ჩაგდებული სეზონის შემდეგ, დიდი შანსია სანტიაგო ბერნაბეუზე დიდი გადატვირთვა ვიხილოთ.
უახლოეს დღეებში რეალ მადრიდის თაობაზე უფრო მეტი ინფორმაცია გახდება ცნობილი. სამეფო კლუბი ახალ ეტაპზე გადასვლას გეგმავს.
