ოფიციალურად — ანხელ დი მარია არგენტინული როსარიო სენტრალის ფეხბურთელია! ვეტერანი ფეხბურთელი მშობლიურ კლუბში დაბრუნდა. ამის შესახებ არგენტინულმა კლუბმა ოფიციალური განცხადება უკვე გააკეთა.
ანხელ დი მარია ბენფიკას მსოფლიოს საკლუბო ჩემპიონატის დასრულების შემდეგ დატოვებს და უკან, სამშობლოში დაბრუნდება. ვეტერან ფეხბურთელს პორტუგალიური კლუბის მაისურით ჯამში 88 მატჩი მოუგროვდა, რა დროშიც 32 გოლი გაიტანა და 25 საგოლე გადაცემითაც გამოიჩინა თავი.
ბოლო წლების ერთ-ერთი გამორჩეული არგენტინელი ფეხბურთელი სწორედ როსარიო სენტრალის აკადემიის აღზრდილია, საიდანაც 2007 წელს ბენფიკაში გადაბარგდა. ანხელ დი მარიას დამატებას რამდენიმე კლუბი განიხილავდა, თუმცა ფეხბურთელმა კარიერის დასრულება მშობლიურ გუნდში გადაწყვიტა.
