ბაიერნ მიუნხენი პარის სენ-ჟერმენთან განმეორებით მატჩში ახალი ეკიპირებით იქნება. საუბარია 2026/2027 წლების სეზონის ფორმაზე და ყურადღებიანმა ქომაგებმა ამ ყველაფერში ერთგვარი სიმბოლიზმი აღმოაჩინეს. უკანასკნელად, როცა "რეკორდმაისტერმა" ევროსარბიელზე ითამაშა მომავალი სეზონის ეკიპირებით, ის ტურნირის ტრიუმფატორი გახდა.
საუბარია 2012/2013 და 2019/2020 წლების სეზონებზე - ორივე შემთხვევაში ჩემპიონთა ლიგის გამარჯვებულები ალიანც არენას ბინადრები გახდნენ. 6 წლის წინანდელ ფინალში ბაიერნმა მოუგო სწორედ პსჟ-ს - მოწინააღმდეგეს, რომელსაც ის დღეს უპირისპირდება. როგორც გვახსოვს, მიუნხენელებს იმ დუელში ჩემპიონობა კინგსლი კომანის გოლმა მოუტანა.
"რეკორდმაისტერმა" ეს დეტალიც გაითვალისწინა და "ლურჯ-წითლებთან" მატჩის წინ, გაყიდვაში სწორედ ფრანგი შემტევის მაისურიც ჩაუშვა. ალ-ნასრის ვინგერი უკვე დიდი ხანია, რაც აღარ თამაშობს ალიანც არენაზე, მაგრამ ევროპაში ჩემპიონობისა და პარკ დე პრენსის მკვიდრებთან მოგების სიმბოლოდ სწორედ ის რჩება.
