დადასტურებულად — ჩელსის ხელმძღვანელობასა და ჩაბი ალონსოს შორის პირველი ოფიციალური კონტაქტი შედგა, სადაც მხარეებმა პოტენციურ თანამშრომლობაზე ისაუბრეს. ლონდონურ კლუბში ესპანელი სპეციალისტი ყველას მოსწონს და ფიქრობენ, რომ მისი მთავარი მწვრთნელის პოსტზე დანიშვნით, კლუბი კრიზისიდან გამოსვლას შეძლებს. როგორც იწერება, ჩაბი ალონსო ჩელსის შემოთავაზებაზე სერიოზულად ფიქრობს, რაც იმას ნიშნავს, რომ დიდი შანსია მხარეებმა შეთანხმებას მალე მიაღწიონ.
ჩაბი ალონსოს გარდა, სიაში ანდონი ირაოლა (ბორნმუთი) და მარკო სილვაც (ფულემი) რჩებიან. ორივე მათგანთან ლონდონური კლუბი მუდმივ კონტაქტზეა, თუმცა ამ მომენტისთვის ფავორიტი ცალსახად ჩაბი ალონსოა.
გავლენიან ბრიტანულ წყაროებს თუ დავუჯერებთ, ჩელსის ხელმძღვანელობის სურვილია, ახალი მთავარი მწვრთნელი მიმდინარე თვის ბოლომდე შეირჩეს, რაც იმას ნიშნავს, რომ უახლოეს კვირებში უფრო მეტ სიახლეს ველოდებით.
