ქართული ფეხბურთისა და დინამო თბილისის გულშემატკივარს, საქართველოს ყველაზე ტიტულოვანმა კლუბმა სპეციალურად 100 წლის იუბილესთვის შექმნილი ლურჯ-თეთრი ფორმები წარუდგინა.
“ერთი საუკუნე, ერთი გუნდი, ერთი ისტორია,
სიამაყით წარმოგიდგენთ დინამო თბილისის 100 წლის იუბილესთვის შექმნილ ფორმებს, რომლებიც საუკუნოვან ისტორიას იტევს”...
1925 წლის შემოდგომით დაარსებულმა კლუბმა საქართველოს ჩემპიონობა ისტორიაში ყველაზე მეტჯერ - 19-ჯერ მოიგო, 13-ჯერ მოიპოვა საქართველოს თასი, 9-ჯერ სუპერთასს დაეუფლა, 1981 წელს, თასების მფლობელთა თასი აღმართა, 2-ჯერ გახდა სსრკ-ს ჩემპიონი, ასევე 2-ჯერ სსრკ თასის გამარჯვებული - 2004 წელს კი დსთ-ს თასის მფლობელი.
ბოლოს გეტყვით, რომ საქართველოს ეროვნული ლიგის 2025 წლის სეზონი 1 მარტს განახლდა, თუმცა დასავლეთ საქართველოში არსებული დიდთოვლობისა და უამინდობის მიზეზით, დინამო თბილისს დინამო ბათუმთან დაგეგმილი მატჩი 1 აპრილისთვის გადაედო.
შესაბამისად, დინამო თბილისი სეზონს 6 მარტს, 19:00 საათიდან, დინამო არენაზე, სამგურალის წინააღმდეგ განაახლებს.
