საქართველოს ეროვნული საფეხბურთო ნაკრების მეკარე გიორგი მამარდაშვილი, საქართველოს სპორტულ ჟურნალისტთა ასოციაციის გამოკითხვის შედეგად 2024 წლის საუკეთესო ქართველი მამაკაცი სპორტსმენი გახდა.
გიორგი მამარდაშვილს კუთვნილი ჯილდო 18 მაისს"ვალენსიას" შემადგენლობაში "მესტალიაზე" გამართული ბოლო საშინაო შეხვედრის შემდეგ გადაეცა. სპორტის სამინისტროს მხარდაჭერით, ესპანეთში საქართველოს სპორტულ ჟურნალისტთა ასოციაციის პრეზიდენტი გიგა გვენცაძე და ვიცე-პრეზიდენტი ბიძინა ბარათაშვილი ჩავიდნენ და 2024 წლის საუკეთესო მამაკაცი სპორტსმენი დააჯილდოეს.
საქართველოს სპორტულ ჟურნალისტთა ასოციაციის გამოკითხვაში, 75-მა სპორტულმა ჟურნალისტმა მიიღო მონაწილეობა. გიორგი მამარდაშვილმა 107 ქულა დააგროვა, 88 ქულით მეორე შედეგი ლაშა ბექაურს ჰქონდა, მესამე ადგილი კი 69 ქულით ლაშა ტალახაძემ დაიკავა.
გამოკითხვა 1964 წლიდან ტარდება და 2024 წლის გამოკითხვამდე, ფეხბურთელთაგან, სლავა მეტრეველმა, მურთაზ ხურცილავამ, რამაზ შენგელიამ და ხვიჩა კვარაცხელიამ გაიმარჯვეს.
გიორგი მამარდაშვილმა სპორტულ სპორტულ ჟურნალისტებს მადლობა გადაუხადა:
"მადლობა მინდა გადავუხადო სპორტულ ჟურნალისტებს. ჩემთვის ძალიან საპატიოა ეს პრიზი, მითუმეტეს, როცა ოლიმპიურ წელს მოვიგე. დასაფასებელია ეს ყველაფერი და დიდი მადლობა მათ. "
საქართველოს სპორტულ ჟურნალისთა ასოციაციის პრეზიდენტმა, გიგა გვენცაძემ, ქართველი სპორტული ჟურნალისტების სახელით, გიორგი მამარდაშვილს წარმატება უსურვა:
" შარშანდელი, ოლიმპიური წელი განსაკუთრებულად წარმატებული იყო ქართული სპორტისთვის და ასეთი სერიოზული კონკურენციის პირობებში, როდესაც ოლიმპიური, მსოფლიო და ევროპის ჩემპიონები, საბედნიეროდ, მრავლად გვყავდა, გამარჯვება, ალბათ, განსაკუთრებით მისალოცია. წარმატებები მინდა ვუსურვო გიორგის, რომელიც ქართული ფეხბურთის დიდი იმედია."
