გამარჯვება ყოველთვის შესაძლებელია თუ წაგებას არ დანებდები და გააგრძელებ შრომასა და ბრძოლას, - აღნიშნული თეორიის ჭეშმარიტება რამდენიმე დღის წინ, კიდევ ერთხელ ირწმუნა საზოგადოებამ, როცა მონტენეგროს დედაქალაქ პოდგორიცაში კვარცხლბეკის უმაღლეს საფეხურზე ქართველი ძიუდოისტი ილია სულამანიძე ავიდა (-100 კგ.).
ილია სულამანიძემ ევროპის ჩემპიონატის ფინალურ შეხვედრაში პრინციპული მეტოქე, აზერბაიჯანელი ზელიმ კოცოიევი დაამარცხა. მეტოქე, ვისთანაც ოლიმპიური თამაშებისა და ევროპის ჩემპიონატის ფინალი წააგო.
ევროპის ჩემპიონატი, გამარჯვება და სამომავლო გეგმები, - ამ თემების შესახებ, სამშობლოში დაბრუნებულმა ჩემპიონმა, ილია სულამანიძემ La Gazzetta dello Sport Georgia-სთან ინტერვიუში ისაუბრა:
- გილოცავთ ევროპის ჩემპიონობას, გადამწყვეტი შეხვედრა მოიგე პრინციპულ მეტოქესთან, რას იტყვი ფინალური დაპირისპირების შესახებ?
- ოლიმპიადის შემდეგ, ევროპირველობა პირველი დიდი ტურნირი იყო და ჩემთვის ძალიან მნიშვნელოვანი. რაც შეეხება ფინალს, როცა გავიგე რომ საჩემპიონო დაპირისპირებაში ვხვდებოდი, ზელიმ კოცოიევს, მას ვისთანაც ოლიმპიადის ფინალში დავმარცხდი, კიდევ უფრო მეტი დატვირთვა ჰქონდა ამ ფინალს, მაგრამ არა იმდენად რომ იმ სურვილზე მეტი ყოფილიყო, რასაც ევროპის ჩემპიონობა ჰქვია. ვგულისხმობ იმას, რომ ევროპის ჩემპიონობა უფრო მინდოდა, ვიდრე კონკრეტული მეტოქის დამარცხება, ვინც ოლიმპიადის ფინალში მომიგო. საბოლოოდ მოვუგე და ევროპის ჩემპიონი გავხდი, რა თქმა უნდა, ძალიან გახარებული და ბედნიერი ვარ.
- კოცოიევთან მოგება შესაძლოა, იყოს შენი კარიერისთვის გარდამტეხი?
- ეს გამარჯვება რა თქმა უნდა, მნიშვნელოვანია, მაგრამ შემდეგ ეტაპზე სტატისტიკის გარდა არაფერს არ გვაძლევს. მომავალი ტურნირებისთვის. თუ არ მოინდომე, ივარჯიშე, საბრძოლველად არ განეწყვე, ამ მოგების ხარჯზე ელოდო რომ შემდეგ შეხვედრაში დაგეხმარება, ასე არ არის, არაფერს არ გაძლევს, პირიქით შესაძლოა, დაგაზარალოს იმაზე ფიქრმა, რომ მე ერთხელ მოვუგე, ბოლო დაპირისპირებაში გავიმარჯვე და ეს რამეში დამეხმარება, პირიქით, უნდა იფიქრო იმაზე, თუ როგორ მიუდგე ხელთავიდან ძლიერ მოწინააღმდეგეს.
- ოლიმპიადის შემდეგი პერიოდი, რეაბილიტაცია გავლილია, ევროპის ჩემპიონატზე გამარჯვებამ თავდაჯერებულობა შეგმატა?
-ოლიმპიადის შემდეგ, თავდაჯერებულობა არ შემლახვია. კვარცხლბეკზე უკვე გაანალიზებული მქონდა ყველაფერი, მივიღე გამოცდილება, რაც შემდეგი დაპირისპირებებისთვის უნდა გამომეყენებინა. რა თქმა უნდა, გული დამწყდა, მაგრამ შემდეგი შეჯიბრებისთვის ის წაგება უფრო მოტივაცია იყო, ვიდრე შემაფერხებელი.
- მსოფლიოს ჩემპიონატი გელით, ვინ იქნება შენთვის ყველაზე რთული მეტოქე?
- მსოფლიოს ჩემპიონატზე ვინც ჩემ წონაშია ყველა უნდა შევისწავლოთ, ყველა ანგარიშგასაწევი ძალაა, რადგან თუ მოწინააღმდეგეს სათანადოდ არ შეაფასებ, შესაძლოა, დაზარალდე, ასე რომ ყველასთვის ვემზადები.
- განვლილი კარიერაში ჩატარებული შეხვედრებიდან რომელს გამოყოფ?
- ტურნირის მასშტაბების გათვალისწინებით, რა თქმა უნდა, ოლიმპიადის ნახევარფინალი იყო ძალიან მნიშვნელოვანი და ასევე, ევროპის ჩემპიონატის ფინალი, რადგან ეს ის შეხვედრებია, რითაც ძალიან ბევრი რამ გადაწყდა ჩემს სპორტულ კარიერაში.
- მთავარი მოტივაციის მომცემი რა იყო შენთვის?
- მოტივაცია უფრო ვარჯიშზე გვჭირდება, როცა ძალიან დიდი შრომის გაწევა გიწევს, კუნთები გტკივა, მაგრამ მეორე დღეს იმავეს უნდა გაუძლო და აქ დიდი მოთმინებაა საჭირო. ტურნირებზე კონკრეტულად რაც გვგავს გასაკეთებელი იმაზე ვფიქრობთ, სხვა არაფერზე არ გვეფიქრება.
- საქართველოს ძიუდოს ნაკრები უძლიერესი სპორტსმენებითაა დაკომპლექტებული, რას ნიშნავს იყო ამ ნაკრების წევრი?
- ძალიან მიხარია, რომ ამ კონდიციის ნაკრებთან ერთად მიწევს ჩემი კარიერის გავლა. ლაშა ბექაური, ლაშა შავდათუაშვილი და ყველა, ვინც ნაკრებშია მათთან ვარჯიში არის მოტივაცია. ჩვენ გუნდში ყველას დიდი მოტივაცია გვაქვს და ყველა ერთმანეთს ვგულშემატკივრობთ, ვამხნევებთ. ჩემი ყველა გუნდელისგან ვიღებ მხარდაჭერასა და მოტივაციას.
- საქართველოს ძიუდოს ნაკრების მთავარი მწვრთნელის, ლაშა გუჯეჯიანის შესახებ რას იტყვი?
- ლაშა გუჯეჯიანზე ძალიან ბევრი შემიძლია ვილაპარაკო, არამარტო ჩემთვის არამედ, მთელი ნაკრებისთვის ყველაზე მნიშვნელოვანი მწვრთნელია, რადგან ყველა ნაბიჯი რასაც ვდგამთ შეჯიბრებამდე, ვარჯიშისა ან უშუალოდ ტურნირის დროს ყველაფერი ლაშასთან თანხმდება. ის ქმნის ამ ყველაფერს, ძალიან მიხარია რომ მე შევხვდი ლაშა გუჯეჯიანს და მასთან ერთად მიწევს ამ კარიერის გავლა. ძალიან მადლიერი ვარ მისი, უდიდესი წვლილი მიუძღვის ჩემს განვითარებასა და წარმატებაში. გარდა სპორტისა, ის ჩემთვის კარგი მეგობარია.
- ევროპის ჩემპიონატის დაჯილდოების ცერემონიალზე, კვარცხლბეკზე დგომა შენთვის ძალიან ემოციური აღმოჩნდა…
- კვარცხლბეკი არის ადგილი, სადაც ყველაზე მეტად იაზრებ შენი წარმატების შედეგს და ფიქრობ, ხარ ადამიანი, ვისაც მიეცა იმის შესაძლებლობა, რომ რამით ესახელებინა სამშობლო და ხვდები, რომ რაღაც გააკეთე. კვარცხლბეკზე დაგხარ, გესმის შენი სამშობლოს ჰიმნი, საქართველოს დროშა ყველაზე მაღლა იწევა, გავაცნობიერე ეს ყველაფერი და ეს იყო ემოცია, რის გამოც ცრემლები მომეძალა.
- ქართველ გულშემატკივარს რას ეტყვი?
- ძალიან დიდი მადლობა მინდა ვუთხრა გულშემატკივრებს, ის წარმატება, რასაც აღწევ, მარტო შენი არ არის, ეს ეკუთვნის ჩვენს ქვეყანასა და ჩვენს ხალხს. გამარჯვება თანამემამულეებთან ერთად თუ არ გაიზიარე არანაირი მნიშვნელობა არ აქვს შენს წარმატებას. ქომაგისგან წამოსული მუხტი ჩემთვის ძალიან მნიშვნელოვანი.
ფოტო: ევროპული ძიუდოს კავშირი
