რამდენიმეკვირიანი მოლაპარაკებები საბოლოო შეთანხმებით დასრულდა — მატეო რეტეგი ატალანტადან კარიერას ალ ქადსიაში გააგრძელებს. მხარეებს შორის არც მეტი, არც ნაკლები €70 მილიონიანი გარიგება შედგა! 26 წლის იტალიელ ფორვარდს საუდიში უკვე ელოდებიან, სადაც ახალ კლუბში სამედიცინო შემოწმებას გაივლის და კონტრაქტს ხელს მოაწერს.
მას შემდეგ, რაც ჯან პიერო გასპერინიმ ატალანტა დატოვა, ბერგამოული კლუბისთვის მატეო რეტეგი ხელშეუხებელი აღარ იყო. იმის მიუხედავავად, რომ საქმეში რამდენიმე ევროპული კლუბიც იყო, იტალიელმა კარიერის გაგრძელება მაინც საუდის არაბეთში გადაწყვიტა.
მატეო რეტეგი ატალანტას ღირსებას 2024 წლიდან მოყოლებული იცავდა. ფეხბურთელმა ამ დროში 49 მატჩის ჩატარება მოასწრო, გაიტანა 28 გოლი და 9 საგოლე გადაცემითაც გამოიჩინა თავი. ბოლო მომენტში რაიმე გაუთვალისწინებელი თუ არ მოხდება, ალ ქადსია მატეო რეტეგის მომდევნო კვირაში ოფიციალურად წარადგენს.
