2022 წლის მიწურულს კრიშტიანუ რონალდუ გადავიდა ალ-ნასრში, მისი კონტრაქტი კი დღემდე რჩება სპორტის ისტორიაში ერთ-ერთ ყველაზე სარფიან გარიგებად. ევროებში რომ გადავიყვანოთ, პორტუგალიელი ფორვარდის ყოველწლიური ხელფასი 208 მილიონ ევროს შეადგენს, რითაც ის ყველაზე მაღალანაზღაურებად მოთამაშედ რჩება.
რიადელთა კაპიტანს კვირაში დაახლოებით ოთხი მილიონი ევრო ერიცხება, საერთო ჯამში კი მან აზიაში უკვე 67 კვირა გაატარა. ამ კლუბში გადასვლის მომენტიდან დღემდე, პორტუგალიის ეროვნული გუნდის ლეგენდარულმა მე-7 ნომერმა უკვე 267 მილიონ ევროზე მეტი გამოიმუშავა. აქვე დავამატებთ, რომ 39-წლის ფორვარდის ხელშეკრულება 2025 წლამდე არის გათვლილი.
რაც შეეხება რონალდუს სტატისტიკას, საუდის არაბეთში მან 62 შეხვედრა ჩაატარა და 56 გოლი გაიტანა. ჯერჯერობით უცნობია, თუ რას აპირებს პორტუგალიელი ფორვარდი ალ-ავალ პარკის ბინადრებთან ხელშეკრულების ამოწურვის შემდეგ. თავად მოთამაშეს არავითარი განცხადება ჯერ არ გაუკეთებია.
