სეზონის ბოლოს, ზაფხულში რაიმე განსაკუთრებული თუ არ მოხდება, კარლო ანჩელოტი რეალ მადრიდს დატოვებს! დიახ, სამეფო კლუბში ეს გადაწყვეტილება უკვე მიიღეს, რის შესახებაც იტალიელ სპეციალისტს უკვე აცნობეს. ფლორენტინო პერესის აზრით, პაპა კარლომ სანტიაგო ბერნაბეუზე საკუთარი თავი ამოწურა და გუნდს ახალი სეზონის წინ, ახალი მთავარი მწვრთნელი სჭირდება.
კარლო ანჩელოტი, რომ კლუბის დატოვებასთან ძალიან ახლოს იყო, ამის შესახებ ბოლო დღეების განმავლობაში ყველა გავლენიანი გამოცემა წერდა. იმის მიუხედავად, რომ იტალიელს რეალის დატოვება არ სურს, კლუბში გადაწყვეტილება უკვე მიიღეს. მეტიც, არის შანსი, კარლო ანჩელოტიმ ესპანური გრანდი მსოფლიოს საკლუბო ჩემპიონატის დაწყებამდეც კი დატოვოს.
ამასობაში, ბრაზილიის ფეხბურთის ფედერაცია აქტიურობას აგრძელებს. "სელესაო" ყველაფერს აკეთებს კარლო ანჩელოტის დასაყოლიელებლად და როგორც ირკვევა, იტალიელი ამ შემოთავაზებაზე სულ უფრო და უფრო ხშირად ფიქრობს.
ვინ შეცვლის იტალიელს რეალ მადრიდში?
ამ კითხვაზე სამეფო კლუბში მარტივი პასუხი აქვთ — ჩაბი ალონსო #1 სამიზნეა! ამის შესახებ ლევერკუზენში კარგად იციან და ისინი ესპანელი მწვრთნელისთვის ხელის შეშლას არ აპირებენ. გერმანულ კლუბში მოლოდინის რეჟიმში არიან, რადგან იციან, რომ თუ ალონსო გუნდს დატოვებს, ამას მხოლოდ და მხოლოდ რეალ მადრიდის გამო გააკეთებს. მხარეებს შორის მუდმივი კონტაქტი გრძელდება, უახლოეს კვირებში კი ფლორენტინო პერესი საქმის ბოლომდე მიყვანას შეეცდება.
როგორც ჩანს, ზაფხულში რეალ მადრიდში დიდი ცვლილებები მოხდება. მთავარი მწვრთნელის გარდა, მოსალოდნელია, რომ გუნდს რამდენიმე ფეხბურთელიც დატოვებს, რაც იმას ნიშნავს, რომ სამეფო კლუბს საკმაოდ დატვირთული ზაფხულის სატრანსფერო ფანჯარა ექნება.
