ბევრს არ ახსოვს ის ფაქტი, რომ ჟოზე მოურინიო კარიერის დასაწყისში ბარსელონაში მუშაობდა. 1996-2000 წლებში ის ასრულებდა თარჯიმნისა და ასისტენტის მოვალეობას, სერ ბობი რობსონისა და ლუი ვან გაალის გვერდით. აღსანიშნავია ის ფაქტი, რომ 2000-იანების ბოლოს, პორტუგალიელი ტაქტიკოსი კატალონიაში დაბრუნებასთან ახლოს იყო.
BBC One-ზე გამოვიდა დოკუმენტური პროექტის, How To Win The Champions League-ს ბოლო ეპიზოდი, რომელიც სწორედ მილანის ინტერის ყოფილ სპეციალისტს დაეთმო. The Athletic-ის ჟურნალისტი, ჯეიმს ჰორნკასლი იხსენებს, რომ "ნერაძურიში" დანიშნვის წინ, "განსაკუთრებულს" "ბლაუგრანას" ვარიანტიც ჰქონდა.
"2008 წელს, ბარსელონა ეძებდა რაიკაარდის შემცვლელს, კანდიდატებს შორის კი მოურინიო და გუარდიოლა იყვნენ. რაც შეეხება მათ რეზიუმეს, ჟოზეს შედეგები იყო ბევრად შთამბეჭდავი: ჩემპიონთა ლიგა პორტუში და რამდენიმე ტიტული ჩელსისთან ერთად. პეპს კი ჰქონდა 1 სეზონი კატალონიელთა სარეზერვო გუნდში.
პორტუგალიელი მწვრთნელის უპირატესობის მიუხედავად, "ბლაუგრანამ" აირჩია კატალონიელი სპეციალისტი, რადგან ის მათთვის უფრო შინაური იყო. კამპ ნოუს ბინადრების უარმა ლონდონელთა ყოფილი დამრიგებლის შემდგომ კარიერაზე ძალიან დიდი გავლენა მოახდინა. "განსაკუთრებული" ფეხბურთის ბნელი ლორდი გახდა."
62 წლის მწვრთნელს ბარსელონას წინააღმდეგ ჩატარებული აქვს 27 მატჩი, მხოლოდ ლივერპულის წინააღმდეგ უთამაშია მას უფრო ხშირად, 31-ჯერ. დავუბრუნდეთ კატალონიელებთან დაპირისპირებებს, რომლებშიც მოურინიომ მოიგო 8 შეხვედრა, 9-ჯერ ითამაშე ფრედ, 10-ჯერ კი წააგო.
