რეალ მადრიდში ახალი სეზონისთვის მზადება უკვე დაიწყეს. უახლოეს პერიოდში კარლო ანჩელოტის საკითხი გადაწყდება და თუ ყველაფერი გეგმის მიხედვით წავა, იტალიელს ჩაბი ალონსო შეცვლის. რაც შეეხება ტრანსფერებს, როგორც რამდენიმე დღის წინ უკვე მოგახსენეთ, ზაფხულში მადრიდული გრანდი მინიმუმ 3-4 გარიგების გაჩარხვას გეგმავს. დიდი ცვლილებები იქნება არსებულ შემადგენლობაშიც, რადგან როგორც გავლენიანი ესპანური გამოცემები იუწყებიან, სეზონის ბოლოს სამეფო კლუბი შეიძლება 8 ფეხბურთელმა დატოვოს.
ანდრეი ლუნინი, ხესუს ვალეხო, ფრან გარსია, ფერლან მენდი, დავიდ ალაბა, ლუკას ვასკესი, ლუკა მოდრიჩი და როდრიგო — ამ ფეხბურთელებმა სეზონის ბოლოს დიდი შანსია სანტიაგო ბერნაბეუ დატოვონ.
რეალ მადრიდი ლუკა მოდრიჩსა და ლუკას ვასკესს ახალ კონტრაქტებს ამ დრომდე არ სთავაზობს, ხოლო რაც შეეხება სიაში მყოფ დანარჩენ ფეხბურთელებს, მადრიდული გრანდი მათ სანაცვლოდ ყველა შეთავაზებას განიხილავს. გამონაკლისია როდრიგო — იმის მიუხედავად, რომ ფლორენტინო პერესს მისი შენარჩუნება სურს, ბრაზილიელი ფეხბურთელი თავად განიხილავს სამეფო კლუბის დატოვებას.
ზაფხულის სატრანსფერო ფანჯრის მოახლოებასთან ერთად, რეალ მადრიდის თაობაზე უფრო მეტი ინფორმაცია გახდება ცნობილი.
