L'Équipe-მა შეაჯამა ყველა გუნდის შედეგი საფრანგეთის ჩემპიონატში 1932 წლიდან დღემდე და მათ შორის საუკეთესო გამოავლინა. პირველ პოზიციაზე არის მარსელის ოლიმპიკი, რომელმაც პროფესიონალური საფეხბურთო ლიგის არსებობის მანძილზე 4297 ქულა დააგროვა. შეგახსენებთ, "თეთრ-ლურჯებმა" ჩემპიონატი 10-ჯერ მოიგეს.
ველოდრომის ბინადრების შემდეგ, 3956 ქულით მოდის მონაკო, რომელმაც თავისი ისტორიის მანძილზე ჩემპიონობა რვაჯერ იზეიმა. სამეულს 3918 ქულით ხურავს ბორდო, სწორედ ის კლუბი, რომელიც გასულ ზაფხულს გაკოტრდა და ახლა ფრანგული ფეხბურთის ქვედა საფეხურებზე იმყოფება.
რაც შეეხება პარის სენ-ჟერმენს, 13 ჩემპიონობისა და ლიგა 1-ის ყველაზე ტიტულოვანი გუნდის სტატუსის მიუხედავად, ეს გუნდი 3358 ქულით მხოლოდ მე-7 პოზიციაზე არის. პსჟ-ს არც ისე მაღალი საფეხური განპირობებულია იმით, რომ პროფესიული ლიგა საფრანგეთში შეიქმნა 1932 წელს, დედაქალაქური კლუბი კი 1970 წელს დაარსდა.
პარიზული გუნდის დომინირების გათვალისწინებით, საკმაოდ მაღალია იმის ალბათობა, რომ უახლოეს წლებში ეს გუნდი მოწინავე პოზიციებზე აღმოჩნდეს. ლუის ენრიკეს შეგირდებს ყველაფერი წინ აქვთ.
ყველაზე მეტი ქულა საფრანგეთის ჩემპიონატში, 1932 წლიდან - დღემდე
| გუნდი | ქულების რაოდენობა |
| მარსელი | 4297 |
| მონაკო | 3956 |
| ბორდო | 3918 |
| სენტ-ეტიენი | 3882 |
| ლიონი | 3763 |
| ლილი | 3449 |
| პსჟ | 3358 |
