ფეხბურთში არსებობს ერთგვარი ელიტური კლუბი, სახელწოდებით "სამმაგი გვირგვინი" (Triple Crown). კლუბის სიაში ეწერებიან ფეხბურთელები, რომლებმაც თავისი კარიერის მანძილზე მოახერხეს მუნდიალის, ჩემპიონთა ლიგისა და ოქროს ბურთის მოგება. ისტორიაში არსებობს სულ რაღაც 10 მოთამაშე მსგავსი მიღწევით.
სამმაგი გვირგვინის კლუბს სამი წლის წინ შეემატა ლიონელ მესი, რომელსაც წარსულში არაერთხელ მოუგია ჩემპიონთა ლიგა და ოქროს ბურთი, მაგრამ მუნდიალის ტრიუმფატორი ის მხოლოდ 2022 წელს გახდა. ამ სიაში არგენტინელი ფლეიმეიქერის ყოფნა ყველასთვის გასაგებია, საინტერესოა, ვინ არიან ელიტური კლუბის დანარჩენი წევრები?
საპატიო სიის სათავეში მანჩესტერ იუნაიტედის ლეგენდარული თავდამსხმელი, ბობი ჩარლტონია, რომელმაც ზემოთ ხსენებული სამი ტიტული 1966-1968 წლების შუალედში მოიგო. ინგლისელ ფორვარდს 70-იან წლებში შეემატნენ მიუნხენის ბაიერნის საკულტო მოთამაშეები: ფრანც ბეკენბაუერი და გერდ მიულერი.
ლეგენდარული გერმანელი ფეხბურთელები სამმაგი გვირგვინის კლუბის წევრები 1972 - 1976 წლებში გახდნენ. სიაში შემდეგი, კიდევ ერთი საკულტო მოთამაშე, პაოლო როსი არის. ყველამ ვიცით, თუ როგორი გამორჩეული იყო მისთვის 1982 წელი (მუნდიალი, ოქროს ბურთი), 1985-ში კი იტალიელმა ფორვარდმა ტურინის იუვენტუსთან ერთად ჩემპიონთა თასიც მოიგო.
დადგა ზინედინ ზიდანის ჯერიც, რომელმაც 1998 წელს მოპოვებულ ჯილდოებს (მსოფლიო ჩემპიონატი, ოქროს ბურთი), 2002-ში ჩემპიონთა ლიგაც მიამატა. ახლა კი იწყება ბრაზილიელი ჯადოქრების დომინაცია, პირველი -რივალდო ვიტორ ბორბა ფერეირა, რომელმაც სანატრელი ჯილდოები 1999-2003 წლებში მოიგო.
მეორე -რონალდინიო გაუჩო. 2002 წელს მოგებულ მსოფლიო ჩემპიონატს მან 2005 - 2006 წლებში ჩემპიონთა ლიგა და ოქროს ბურთიც მიამატა. მესამე -რიკარდო კაკა, ისევ 2002 წლის მუნდიალი და შემდეგ უკვე მისთვის ტრიუმფალური - 2007 წელი. როგორი გასაკვირი და სამწუხაროც არ უნდა იყოს, ელიტურ კლუბში ადგილი რონალდო ნაზარიოსთვის ვერ მოიძებნა.
ბრაზილიელი თავდამსხმელის კოლექციაშია მსოფლიო ჩემპიონობა და ოქროს ბურთები, თუმცა არა - ჩემპიონთა ლიგა. მართალია, ის 2007 წელს მილანში ირიცხებოდა, როდესაც ამ კლუბმა მოიგო ლიგა, მაგრამ "სელესაოს" ფორვარდი განაცხადს მიღმა იყო. ის "როსონერიში" გადავიდა ზამთარში და უეფას იმდროინდელი წესების მიხედვით, იანვარში მოსულ მოთამაშეს არ ჰქონდა ევროთასებზე თამაშის უფლება, თუ ის იმავე სეზონზე სხვა კლუბის მაისურით გამოდიოდა.
როგორც აღვნიშნეთ, 2022 წლის მსოფლიო ჩემპიონატის შემდეგ, სამმაგი გვირგვინის კლუბს შეემატა ინტერ მაიამის ამჟამინდელი კაპიტანიც, 2025 წლის 22 სექტემბრიდან კი უკვე უსმან დემბელეც. კრიტიკის ქარ-ცეცხლში გატარებული და ტრავმებისკენ მიდრეკილი ბარსელონას ყოფილი ვინგერი, დღეს, მსოფლიოს საუკეთესო მოთამაშეა.
ფრანგმა გარემარბმა გასულ სეზონში პარის სენ-ჟერმენთან ერთად დაისაკუთრა პრაქტიკულად ყველა ტიტული, რაც კი შეიძლებოდა. უშუალოდ მუნდიალი პსჟ-ს ვინგერმა მოიგო ჯერ კიდევ 2018-ში, დღეიდან კი ის ოქროს ბურთის მოქმედი მფლობელია. დიახ, ელიტურ სიაში არ არიან ზემოთ ხსენებული "ფენომენი", კრიშტიანუ რონალდუ, ნეიმარ ჟუნიორი, კილიან მბაპე და სხვები, მაგრამ არის პარიზელთა ამჟამინდელი მე-10 ნომერი, თუმცა უნდა ითქვას, რომ სრულიად დამსახურებულად.
