პარიზის პარალიმპიური თამაშების დასკვნით დღეს საქართველოს მე-9 მედალი პარაძალოსანმა აკაკი ჯინჭარაძემ (+107კგ) მოუტანა. აკაკიმ 250 კგ. დაძლია და ბრინჯაოს მედალს დაეუფლა. ქართველმა კარიერაში მესამე ოლიმპიადაზე იასპარეზა. პარაძალოსანი ევროპის ჩემპიონატის გამარჯვებული და მსოფლიო თასის მრავალგზის მფლობელია.
პარალიმპიური თამაშების დასრულების შემდეგ, აკაკი ჯინჭარაძე ახალი მიზნებისთვის ბრძოლას იწყებს და გულშემატკივარს ბევრ გამარჯვებას ჰპირდება.
პარალიმპიური თამაშები, მზადება ახალი მწვერვალების დასაპყრობად და ქართველი გულშემატკივრის გასახარებლად, - აკაკი ჯინჭარაძე LaGazzeta.ge-სთან ინტერვიუში საუბრობს:
- პარალიმპიადაზე მედალი სასიხარულო და კარგი შედეგია, მაგრამ რაღაც ემოციის გარეშე შევხვდი ბრინჯაოს, ისეთი ბრძოლა იყო ერთი კილოთი წამართვეს ვერცხლი, როცა ჩემი მეტოქის აწეული არ ითვლებოდა და ჩაუთვალეს 251 კილო, მაგრამ არაუშავს.
- გამოცდილება, რომელიც პარალიმპიადამ მოგცა..
- გამოცდილება საკმაოდ დამიგროვდა ეს ჩემი მესამე პარალიმპიადაა, ტოკიოშიც ცოტა არ გამიმართლა და მეოთხე ადგილზე გავედი. კარგია, რომ ამ შემთხვევაში მედლის მოპოვება შევძელი.
- ამჯერად რა იქნება მთავარი მიზანი?
- მთავარი მიზანია ყველაფრის მოგება, რაც ჩაინიშნება. წინ მსოფლიოს ჩემპიონატია და დავიწყებთ მომზადებას. 250 კილო დაძლეული გვაქვს და ახლა კიდევ უნდა მოვუმატოთ.
- რამდენად იზრდება კონკურენციის დონე ბოლო პერიოდში?
- კონკურენცია ძალიან დიდია პარაძალოსნობაში. ყველა მოძრაობა რთულია. ჩვენი სახეობა შეზღუდვების მიხედვით, კატეგორიებად არ არის დაყოფილი, სპორტსმენები ყველანი ერთად ვიღებთ მონაწილეობას და კონკურენციაც დიდია.
- ქართველი ხალხი ძალიან გაახარეთ, რას ნიშნავს გულშემატკივრის განსაკუთრებული მხარდაჭერა?
- გულშემატკივარი ჩვენთვის მოტივაციაა და ძალიან მაბედნიერებს და ძალას მმატებს ყოველი სიტყვა და შეძახილი მოტივაციას მაძლევს, რომ გავაგრძელო ვარჯიში, მზადება და შემდეგ შეჯიბრებებზე ჩვენი ჰიმნის აჟღერება.
- რას ჰპირდები გულშემატკივარს?
- დაპირებით ერთს ვიტყვი, არ ვჩერდებით, რა შეჯიბრიც ჩაინიშნება ჩვენი დროშა იქნება ყველაზე მაღლა.
