საქართველოს 21-წლამდე ნაკრებმა ევროპის ჩემპიონატზე პირველი მატჩი მოიგო და პოლონეთი 2:1 დაამარცხა.
მატჩის შემდეგ, ჩვენი ნაკრების ფეხბურთელებმა ეს მატჩი შეაფასეს.
ლუკა ხარატიშვილი: "თითოელი ჩვენთაგანისთვის ეს გამარჯვება ძალიან ემოციურია, რადგან მნიშვნელოვანი 3 ქულა მოვიპოვეთ და პირველ ადგილზე ვართ. მიხარია, რომ ამ გამარჯვებაში ჩემი წვლილი შევიტანე. მომავალი მატჩებისთვისაც მოვემზადებით და ვეცდებით, იქაც სასურველ შედეგს მივაღწიოთ. ქართველ გულშემატკივარს დიდ მადლობას ვუხდი აქ ჩამოსვლისთვის და დაფასებისთვის, მთელი 90 წუთი მათ გვერდში დგომას ვგრძნობდით"
ირაკლი აზაროვი: "მადლობა ამ ემოციებისთვის ჩვენს გულშემატკივრებს. შევეცდებით, რომ მომავალი მატჩებიც ასე ჩავატაროთ. პირველი 3 ქულა დიდ რამეს ნიშნავს, წინ რთული თამაშები გველოდება და იქაც წარმატებას უნდა მივაღწიოთ. ვხედავდით, რომ მსაჯი მთლად ჩვენს სასარგებლოდ არ წყვეტდა და ვცდილობდი, მეტოქეებთან კონტაქტში ნაკლებად შევსულიყავი"
საბა საზონოვი: "90 წუთი ვითამაშე და ძალიან მიხარია, რადგან 8 თვე არ მქონდა ნათამაშები და ყველაფერი გავაკეთე, რომ ამ თამაშისთვის მზად ვყოფილიყავი. ხარატიშვილი ბრწყინვალე მეკარეა, ძალიან მიყვარს, კარგი ურთიერთობა გვაქვს და როცა ხარატა გვეხმარება და ბურთებს იღებს, ეს ჩვენთვის მოტივაციაა"
ოთო მამაგეიშვილი: "ძალიან ამაყები ვართ, რომ ქართველები ვართ. აუცილებლად წინსვლას გავაგრძელებთ, დიდი მიზნები გვაქვს დასახული და ერთად ვივლით წინდაწინ. ყოველი მომდევნო თამაში საპასუხისმგებლო და რთულია. ჩვენი ფეხბურთი უნდა ვითამაშოთ და თუ ამას მოვახერხებთ, ჯგუფიდან გავალთ. ბრძოლის ჟინი და ხასიათი ჩვენი წარმატების ერთ-ერთი საიდუმლოა"
