პრედრაგ მიატოვიჩმა მადრიდის რეალის ამჟამინდელი მდგომარეობის შესახებ ისაუბრა. შეგახსენებთ, რომ პირველად 2009 წლის შემდეგ, ჩემპიონთა ლიგის მოქმედმა ტრიუმფატორმა შინ ზედიზედ 2 მატჩი წააგო. "სამეფო კლუბი" ჯერ დამარცხდა ბარსელონასთან (0:4) პრიმერა დივიზიონში, შემდეგ კი მილანთან (1:3) ევროსარბიელზე.
"მგონია, რომ ანჩელოტიმ გუნდზე კონტროლი დაკარგა. გავიხსენოთ მილანთან შეხვედრა, რომელშიც მან არ იცოდა, თუ როგორ გამოესწორებინა სიტუაცია. 2-3 კარგი სეზონის შემდეგ, რეალის მოთამაშეები მოდუნდნენ. მეეჭვება, რომ კარლომ შეძლოს ფეხბურთელების ახლებურად მოტივირება და გუნდის კრიზისიდან გამოყვანა.
უკმაყოფილო მოთამაშეების რიცხვი დღითიდღე მატულობს. უყურადღებოდ რჩებიან გიულერი და ენდრიკი, ბელინგემი კი საერთოდ დაკარგულია. ამის გარდა, მბაპესა და ვინის ერთ ფლანგზე სურთ თამაში. ძალიან რთული მდგომარეობაა", - განაცხადა ყოფილმა მონტენეგროელმა ფორვარდმა.
