19 მაისს 20 წლის გიორგი სარდალაშვილმა (60 კგ.) მსოფლიოს ჩემპიონატის ფინალში, დამატებით დროში ტაივანელ იუნგ ვეი იანგს ვაზარით მოუგო და მსოფლიოს ჩემპიონატის პირველივე საშეჯიბრო დღეს აბუ-დაბიში საქართველოს ჰიმნი ააჟღერა.
20 წლის გიორგი სარდალაშვილი დამოუკიდებელი საქართველოს ისტორიაში ყველაზე ახალგაზრდა მსოფლიოს ჩემპიონია. გიორგიმ შარშან მსოფლიოს ჩემპიონატზე ბრინჯაოს მედალი მოიპოვა.
ისტორიული გამარჯვების ავტორს, 20 წლის გიორგი სარდალაშვილს La Gazzetta dello Sport Georgia აბუ-დაბიში დაუკავშირდა, მსოფლიოს ჩემპიონმა lagazzetta.ge-სთან გამარჯვებისა და გამარჯვებამდე განვლილი გზის შესახებ ისაუბრა:
- გილოცავ გიორგი, მსოფლიოს ჩემპიონი ხარ, რას გრძნობ?
- მსოფლიოს ჩემპიონობა რას ნიშნავს ჯერ კიდევ ვერ აღვიქვამ. ვიცი დიდი რაღაც გავაკეთე, მაგრამ ჯერ ვერ ვაცნობიერებ, რომ მსოფლიოს ჩემპიონი ვარ. ჩემს ოჯახს რომ დავურეკე და მათი ბედნიერი სახეები დავინახე ძალიან გამიხარდა.
- ფინალის ბედი რამ გადაწყვიტა?
- ეს ყველაფერი მწვრთნელების დამსახურებაა, ლაშა გუჯეჯიანის, ასევე დავით ქევხიშვილისა და ყველასი, ვინც იქ იყო და მამხნევებდა. მათი შეძახილები ძალას მაძლევდა და მებრძოლი ხასიათი შემიქმნეს.
- რა განწყობით წახვედი მსოფლიოს ჩემპიონატზე?
- მსოფლიოს ჩემპიონატზე კონკრეტული მიზნით წავედით, რომ აგვეღო ქულები ოლიმპიადისთვის. არაფერი დაგვიგეგმია, ეს პროცესმა მოიტანა, მეტსაც გეტყვით, არც ერთი ვარჯიში არ გამომიტოვებია იმის გამო რომ მსოფლიოს ჩემპიონატი მქონდა საჭიდაო და ყოველდღე ბოლომდე ვიხარჯებოდი ვარჯიშზე.
- ფინალის მერე რა გითხრა ნაკრების მთავარმა მწვრთნელმა, ლაშა გუჯეჯიანმა?
- ტატამიდან რომ გამოვედი მახსოვს ლაშა გუჯეჯიანმა მითხრა, იცი რა გააკეთეო? მსოფლიოს ჩემპიონი ხარო, ჯერ ტატამზე შესვლამდე მამხნევებდა და მოგების მერე მითხრა მსოფლიოს ჩემპიონი ხარო, ვერ ვხვდებოდი რა ხდებოდა და მერე დამაჯერა.
- შრომა, რომელიც მსოფლიოს ჩემპიონობის მიღმა დგას, გვითხარი რა გზა გაიარე აქამდე?
- აქამდე დიდი გზა გავიარე, ჩემს პირად მწვრთნელთან, ლექსო ღვინიაშვილთან ერთად, ძიუდოს ფედერაციის ვიცეპრეზიდენტ დავით ქევხიშვილთან ერთად, ასევე პროექტ 2024-ის მწვრთნელებთან ირაკლი ცირეკიძესა და გიორგი ყიზილაშვილთან, ასევე გურამ მოდებაძესთან ერთად. ეს გზა რთული იყო, მადლობა ყველას. იყო მარცხიც, გასულ წელს ზედიზედ 5 შეჯიბრი წავაგე, მეორე შეხვედრას ვერ გავცდი. მოთმინებაა ამ დროს საჭირო, ასეთ რთულ მომენტებში უნდა აჯობო საკუთარ თავს, როცა ბევრს შრომობ, შედეგი გიბრუნდება, მარცხმა არ უნდა შეგაჩეროს.
- დამოუკიდებელი საქართველოს ისტორიაში ყველაზე ახალგაზრდა მსოფლიოს ჩემპიონი ხარ, რას ნიშნავს ეს?
- მიხარია და ამაყი ვარ, პირველი ვარ, ვინც 20 წლის ასაკში მსოფლიოს ჩემპიონი გახდა. ზოგადად ახალგაზრდებს ძიუდოს ნაკრებში ძლიერი მუხტი გვაქვს შექმნილი. ერთი ამბობს სამჯერ უნდა მოვიგო მსოფლიოო, ერთმა ოთხჯერ უნდა მოვიგო ოლიმპიადაო, ასეთი კონკურენცია გვაქვს შექმნილი, ერთმანეთზე უკეთეს შედეგებს გვინდა მივაღწიოთ და ეს გვაძლიერებს.
- მსოფლიოს ჩემპიონატზე შენი დამსახურებით საქართველოს ჰიმნი რომ ისმის და აცნობიერებ გამარჯვებული ხარ, რა გრძნობაა?
- ეს ყველაზე ძვირფასი წუთებია, როცა შენი სამშობლოს ჰიმნი გესმის, ყველაფერზე ფიქრობ, მთელი შრომა, განვლილი დღეების წვალება გაიელვებს და ხვდები, რომ შრომა ფასდება, შენ ეს შეძელი.
ფოტო: IJF
