ტრადიციული გამარჯვებით დაბრუნდა და გულშემატკივარი კიდევ ერთხელ გაახარა, დაუმარცხებელმა მკლავჭიდელმა, ლევან საგინაშვილმა. იგივე ქართველმა ჰალკმა, როგორც მას გულშემატკივარი ეძახის.
სტამბოლში გამართულ East vs West-ის პრესტიჟულ ღონისძიებაზე, საგინაშვილი კანადელ ჩემპიონს, დევონ ლარატს, კარიერაში მეორედ, დაუპირისპირდა და 4:0 დაამარცხა მეტოქე.
ახალი გამარჯვების, იძულებითი პაუზის, კარიერის დაპირისპირებისა და სამომავლო გეგმების შესახებ ლევან საგინაშვილმა La Gazzetta dello Sport Georgia-სთან ინტერვიუში ისაუბრა:
- ტრადიციულად შთამბეჭდავი გამარჯვება მოიპოვე, ლეგენდარულ დევონ ლარატთან, რამდენად რთული მეტოქე იყო?
- ორი წლის წინ საკმაოდ ადვილად დავამარცხე, თუმცა დღეს სიტუაცია შეცვლილი იყო, ვინაიდან ამ ორი წლის განმავლობაში დევონი ძალიან გაძლიერდა, არ შეუწყვეტია ვარჯიში და რამდენიმე ძალიან ძლიერი მეტოქე დაამარცხა.
- დაახლოებით ერთი წელი, ტრავმის გამო, იძულებითი პაუზა გქონდა, რამდენად რთული პერიოდი იყო და როგორ მოახერხე საბოლოოდ მობილიზება?
- ზაფხულში მაჯის რთული ტრავმა მივიღე და ხანგრძლივი რეაბილიტაციის შემდეგ დავბრუნდი, რაც ძალიან რთული იყო. ძალიან რთული იყო ამ ეტაპის გავლა. ჯერ საქართველოში ვიმკურნალე, შემდეგ ამერიკაში და ბოლოს თურქეთში. დიდ რისკზე წავედი, როცა ამ შეხვედრას დავთანხმდი, იმიტომ რომ არ ვიცოდი, რამდენად მოვასწრებდი სათანადოდ ძალების აღდგენას.
- რომელია კარიერის საუკეთესო დაპირისპირება?
- საუკეთესო დაპირისპირება, ალბათ, ტოპ 8-ის ფინალი რუს სპორტსმენთან, ვიტალი ლალეტინთან.
- გულშემატკივარმა წინასწარ იცის რომ დაუმარცხებელი ჰალკი ისევ მოიგებს, რა არის შენთვის მთავარი გამოწვევა?
- ფსიქოლოგიურად ძალიან დიდი წნეხია, როცა იცი რომ ყველა შენს უპირობო დომინაციით გამარჯვებას ელის. შეჯიბრისთვის როცა ვემზადები მეტოქეზე არასოდეს ვფიქრობ, ყოველთვის ჩემს თავს ვეჯიბრები და ვცდილობ ვაჯობო. რაც შეეხება უშუალოდ შეჯიბრის დღეს, ამ დროს მთლიანად მეტოქეზე ვარ ორიენტირებული და ყოველთვის იმ განწყობით გავდივარ, რომ ის ჩემზე ძლიერია და უნდა დავამარცხო.
- შემდეგი ტურნირი სად და როდისაა?
- შემდეგი ტურნირი, სავარაუდოდ, დეკემბერში, დუბაიში იქნება, თუმცა ჯერ ბოლომდე არაფერია გადაწყვეტილი.
- სხვა სახეობაში გადაბარგება თუ გიფიქრია?
- არა, არ მიფიქრია.
- საქართველოს საფეხბურთო ნაკრების ევროპის ჩემპიონატზე გასვლა როგორ აღნიშნე?
- სტადიონზე ვიყავი, ყვირილით და სიხარულის ცრემლებით აღვნიშნე.
- რას ჰპირდება უძლეველი ჰალკი გულშემატკივარს?
- ჩემს გულშემატკივრებს ვპირდები იმას, რომ ყოველთვის ჩემი შესაძლებლობის მაქსიმუმს გავაკეთებ და არავის მივცემ უფლებას ხელი გადამიწიოს.
