გურულმა ვერცხლის მედალი მოიპოვა. საქართველოს დელეგაციის ანგარიშზე ევროპის ჩემპიონატიდან კიდევ ერთი ვერცხლის მედალია, რომელიც 71 კგ. წონითი კატეგორიის ფინალში ესკერხან მადიევმა მოიპოვა. თუმცა კრივის ფედერაციაში აცხადებენ, რომ მსაჯებს სამართლიანი გადაწყვეტილებები რომ მიეღოთ, საქართველოს ანგარიშზე 2 ოქროს მედალი იქნებოდა.
ევროპის ჩემპიონატზე მომხდარი ინციდენტის შესახებ, La Gazzetta dello Sport Georgia-სთან ინტერვიუში საქართველოს მოკრივეთა ნაკრების მთავარმა მწვრთნელმა, ბეჟან ჭიჭინავამ ისაუბრა:
- რას იტყვით ფინალური ბრძოლების შესახებ?
- როგორც მთავარი მწვრთნელი და კრივის სპეციალისტი ვთვლი, რომ ჩვენ ბრძოლები არ წაგვიგია. ბიჭებმა ბოლომდე იბრძოლეს, გმირები არიან და მინდა მადლობა ვუთხრა, 10 წელია ჩვენ ერთად ვშრომობთ.
- ლაშა გურული აცხადებს, რომ ფინალურ ბრძოლამდე, წაგების სანაცვლოდ რუსეთის სახელით მოასპარეზე მეტოქის წარმომადგენლებმა შესთავაზეს ფული, მსგავსი შეთავაზება თქვენც მიიღეთ?
- ჯერ ჩემთან გამოვიდნენ კონტაქტზე, ჯერ მე დამიკავშირდნენ, შემომთავაზეს ფული, რა თქმა უნდა, უარი ვთქვი, ვუთხრი, რომ ჩვენთან მაგ თემაზე ლაპარაკი გამორიცხულია. მე როგორც მწვრთნელი, პასუხისმგებლობას ვიღებ სპორტსმენზე, რომ ჩვენ ასეთ გარიგებებს არ დავთანხმდებით და ბრძოლას არ გავყიდდით, ასეთი ინტერესი არასდროს გვქონია, ჩვენი ღირსება გვაქვს, ჩვენ ვიბრძვით ჩვენი ქვეყნისთვის და ჩემპიონობისთვის, რისთვისაც სპორტსმენი მთელი ცხოვრება შრომობს. ჩემგან მიღებული უარის შემდეგ, მივიდნენ ლაშასთან და მისგანაც, რა თქმა უნდა, უარი მიიღეს.
- ეს პირები ვინ იყვნენ? რუსეთის კრივის ფედერაციის წარმომადგენლები თუ უშუალოდ ჩეჩენი სპორტსმენის?
- სპორტსმენის, დიდხანს არ გვისაუბრია, 3-4 წუთი, მიხვდნენ რომ ჩვენთან არაფერი გამოუვიდოდათ და წამოვედით. პრინციპში შემიძლია ვთქვა, რომ სპორტსმენის მხარე იყო.
- ევროპის ჩემპიონატის შემდეგ ლაშამ თქვა, რომ გქონდათ გარკვეული სტარტეგია ბრძოლისთვის, თუმცა საუბრობს რომ მსაჯებიც მოისყიდეს...
- ჩემთან როცა მოვიდნენ წინადადებით, უარი ვთქვი და შემდეგ რა მოხდა დადასტურებით ვერაფერს ვიტყვი. ლაშამ ტარხან იდიგოვს 2023 წლის მსოფლიოს ჩემპიონატზე ¼ ფინალში მოუგო. ევროპის ჩემპიონატის ფინალამდე წელს ლაშამ მოქმედ ევროპის ჩემპიონს, ვაჰიდ აბასოვს, მოუგო. ფინალში პირველ რაუნდში 4:1 წაგება რომ ჩაუთვალეს გაოცებულები ვიყავით, ფინალში არ შეიძლება არაფრის დათმობა, პირველი რაუნდი რომ დამთავრდა და ანგარიში მოვიდა, სტრატეგია შევცვალეთ და ქულებს ხმამაღლა შეგნებულად ვითვლიდი, 5:0 რომ მოვიდა მეორე რაუნდის ანგარიში, გაგრძელების აზრი ვეღარ დავინახეთ.
- ესკერხან მადიევზეც საუბრობდით რომ მასაც ეკუთვნოდა გამარჯვება?
- კი, სადაც არ უნდა ყოფილიყო ევროპის ჩემპიონატი ყველგან მადიევი გაიმარჯვებდა, გარდა სერბეთისა, მეტოქე სერბი იყო და ამ ფაქტორმა იმოქმედა.
- რა ხდება მსაჯების მხრივ ოლიმპიურ თამაშებზე, რამდენად ობიექტურები არიან?
- ოლიმპიადა ძალიან გამკაცრებულია და ძალიან დიდი იმედით მივდივარ, მთავარია, ჩვენმა სპორტსმენმა შედეგიანად იბრძოლოს და დარწმუნებული ვარ, იქ ბრძოლას არავინ წაგვართმევს, ჩვენ უნდა მოვიგოთ და მაგ ბრძოლაში არ დავიჩაგრებით.
- მსგავსი შემთხვევა აქამდე გქონიათ?
- მსგავსი შემთხვევა ერევანშიც მომხდარა, იქ ევროპის ჩემპიონი 3 მოასპარეზე გახდა და ერთი ვერცხლის მედალი მოვიპოვეთ. მაშინ გიორგი ყუშიტაშვილის მისამართითაც ანალოგიურმა შეთავაზებამ გაიჟღერა, მაგრამ რა თქმა უნდა, ჩვენ უარი ვთქვით. ის ბრძოლა გიორგი ყუშიტაშვილმა მოიგო და ჩემპიონი გახდა. ევროპის ჩემპიონატზე მოპოვებული წარმატების შემდეგ (სამი ოქროსა და ერთი ვერცხლის მედალი, 2022 წ.) შარშან მსოფლიოს ჩემპიონატზეც ძალიან წარმატებით ვიასპარეზეთ. 109 ქვეყანაში გუნდურ ასპარეზობაში მე-5 ადგილი დავიკავეთ, სადაც 2 ბრინჯაო და 1 ვერცხლი გვქონდა, რაც საქართველოსთვის ისტორიული შედეგი იყო.
ევროპის ჩემპიონატზე მომხდართან დაკავშირებით, La Gazzetta dello Sport Georgia-მ კითხვებით მიმართა ევროპის კრივის კონფედერაციას და რუსეთის კრივის ფედერაციას, თემის შესახებ ახალ დეტალებს გამოხმაურებისთანავე მოგაწვდით.
ქართველი მოკრივეები 9 მაისიდან ოლიმპიური თამაშების სალიცენზიო ტურნირისთვის მზადებას დაიწყებენ. ტურნირი 23 მაისიდან 3 ივნისამდე ტაილანდში გაიმართება. მომავალი ტურნირის სამზადისისა და ოლიმპიური გეგმების შესახებ La Gazzetta dello Sport Georgia საქართველოს მოკრივეთა ნაკრების მთავარ მწვრთნელთან, ბეჟან ჭიჭინავასთან, ინტერვიუს უახლოეს მომავალში შემოგთავაზებთ.
შეგახსენებთ, ლაშა გურულს ოლიმპიური თამაშების ლიცენზია უკვე მოპოვებული აქვს.
ქართველი მოკრივეები 9 მაისიდან ოლიმპიური თამაშების სალიცენზიო ტურნირისთვის მზადებას დაიწყებენ. ტურნირი 23 მაისიდან 3 ივნისამდე ტაილანდში გაიმართება. მომავალი ტურნირის სამზადისისა და ოლიმპიური გეგმების შესახებ La Gazzetta dello Sport Georgia საქართველოს მოკრივეთა ნაკრების მთავარ მწვრთნელთან, ბეჟან ჭიჭინავასთან, ინტერვიუს უახლოეს მომავალში შემოგთავაზებთ.
შეგახსენებთ, ლაშა გურულს ოლიმპიური თამაშების ლიცენზია უკვე მოპოვებული აქვს.
