ტრავმის მოშუშებისა და საფეხბურთო მოედანზე დაბრუნების შემდეგ, ვინისიუს ჟუნიორი საფეხბურთო სამყაროს წინაშე 2002 წლის Nike Chrome Mercurials-ით წარდგება. ბუცების აღნიშნული მოდელი სპეციალურად იქნა დამზადებული რონალდო ნაზარიოსთვის, სამხრეთ კორეა - იაპონიაში გამართული მუნდიალის წინ.
შეგახსენებთ, რომ ბრაზილიელმა თავდამსხმელმა 2002 წლის მსოფლიო ჩემპიონატზე გაიტანა რვა გოლი, მისი ნაკრები კი ტურნირის ტრიუმფატორი გახდა. რაც შეეხება მადრიდის რეალის ფორვარდს, მოედანზე ის დაბრუნდება 18 დეკემბერს, საკლუბო მუნდიალზე. ახალი ბუცებით ტიტულის მოგების შანსი ბრაზილიელ შემტევს პირველივე მატჩში ექნება.
"სამეფო კლუბი" ტურნირს ავტომატურად დაიწყებს ფინალში, მოწინააღმდეგის ვინაობა კი ჯერჯერობით უცნობია. შეგახსენებთ იმასაც, რომ 24 წლის ფორვარდმა დაზიანება მიიღო პრიმერა დივიზიონის გასულ ტურში, ლეგანესთან მატჩში.
