ფორმულა 1-ის 2025 წლის სეზონის რიგით მე-4 გრან პრის ბაჰრეინის საერთაშორისო ავტოდრომმა უმასპინძლა, რომელიც საკმაოდ დაძაბული და სანახაობრივი გამოდგა.
გამარჯვებული მაკლარენის ავსტრალიელი პილოტი, ოსკარ პიასტრი გახდა, მეორე ადგილზე მერსედესის ბრიტანელი მრბოლელი, ჯორჯ რასელი გავიდა, ხოლო მესამე პოზიცია პიასტრის თანაგუნდელმა, ლანდო ნორისმა დაიკავა.
ოსკარ პიასტრის ტრიუმფი ბაჰრეინში
ბაჰრეინის გრან პრიზე უშეცდომო იყო ოსკარ პიასტრი, რომელმაც ჯერ შაბათს მოახერხა კვალიფიკაციის დამაჯერებლად მოგება, ხოლო კვირას პოულ პოზიცია წარმატებით შეინარჩუნა და 2025 წლის სეზონში უკვე მეორე რბოლის გამარჯვებული გახდა.
პრაქტიკებიდანვე გამოჩნდა, რომ ბაჰრეინში საგრძნობი უპირატესობა ექნებოდა მაკლარენს — სამივე პრაქტიკაზე სწორედ ბრიტანულმა გუნდმა აჩვენა საუკეთესო დროები, რასაც კვალიფიკაციის და რბოლის გამარჯვებაც მოჰყვა. ცალკე აღნიშვნის ღირსია პიასტრის მიერ ნაჩვენები რბოლა, რომელმაც 57 წრე უშეცდომოდ გაიარა და უშუალო კონკურენტებს დაწევის საშუალება არ მისცა.
2025 წლის სეზონი 24 წლის ავსტრალიელმა მრბოლელმა ხმაურიანად დაიწყო და ჩატარებული 4 რბოლიდან 2 სწორედ მისი გამარჯვებით დასრულდა. თუ სეზონის წინ ნათელი იყო, რომ მაკლარენში ფსონს ლანდო ნორისზე გააკეთებდნენ, 4 რბოლის შემდეგ სიტუაცია რადიკალურად არის შეცვლილი და ოსკარ პიასტრი პირველობისთვის ბოლომდე იბრძვის. ჩაგდებული სადებიუტო რბოლის შემდეგ, ავსტრალიელმა ბოლო სამი გრან პრიდან ორი მოიგო და ერთში მესამე ადგილი დაიკავა. მიუხედავად იმისა, რომ მისი თანაგუნდელი ანგარიშზე 4-დან 4 პოდიუმია, სატურნირო ცხრილში მხოლოდ 3 ქულით ჩამორჩება.
ჯორჯ რასელის უშეცდომო რბოლა და მორიგი პოდიუმი
მერსედესის ბრიტანელი პილოტი, ჯორჯ რასელი მიმდინარე სეზონში საოცარ ფორმაშია და აღნიშნული მოსაზრება მან ბაჰრეინის საერთაშორისო ავტოდრომზეც დაადასტურა, სადაც არაფერი დაუთმო დომინანტ მაკლარენს და მეორე ადგილზე გავიდა.
27 წლის ბრიტანელმა კვალიფიკაციაზე მეორე საუკეთესო დრო აჩვენა, თუმცა, სტიუარდებმა ის 1 პოზიციით დააჯარიმეს და კვირას სტარტი მესამე ადგილიდან აიღო. რასელმა პირველივე მოსახვევში მოახერხა შარლ ლეკლერის გადასწრება და მეორე ადგილი დაიბრუნა, რაც რბოლის ბოლომდე შეინარჩუნა.
მიუხედავად იმისა, რომ 2025 წლის სეზონს მერსედესი გარკვეული პრობლემებით შეხვდა, რასელი ბოლიდისგან მაქსიმუმს იღებს და ჩატარებული 4 გრან პრიდან 3-ჯერ პოდიუმზე ავიდა. კარგ შედეგებს აჩვენებს მისი დებიუტანტი თანაგუნდელი, კიმი ანტონელიც, რომელმაც 30 ქულის მოგროვება მოახერხა და სატურნირო ცხრილში მე-6 ადგილს იკავებს.
ცუნოდას პირველი ქულები რედ ბულში და ვერსტაპენის რთული უქმეები
პირველი ქულების აღება მოახერხა რედ ბულის ახალმა პილოტმა, იუკი ცუნოდამ, რომელმაც ლიამ ლოუსონი იაპონიის გრან პრიზე ჩაანაცვლა. ბაჰრეინში იაპონელმა კვალიფიკაციაზე მე-10 ადგილი დაიკავა, ხოლო რბოლა მე-9 პოზიციაზე დაასრულა და 2 ქულა ჩაიწერა აქტივში.
საკმაოდ მძიმე უქმეები გამოუვიდა მოქმედ მსოფლიო ჩემპიონს, მაქს ვერსტაპენს, რომლის ბოლიდიც პრაქტიკებიდან მოყოლებული არასტაბილურად გამოიყურებოდა და რედ ბულის ინჟინრებმა ვერც რბოლაში შეძლეს სიტუაციის გამოსწორება, რაც სარბოლო ტრეკზე კარგად ჩანდა.
27 წლის ნიდერლანდელმა კვალიფიკაციაზე მისთვის უჩვეულო, მე-7 პოზიცია დაიკავა და რბოლის დღეს მხოლოდ 1 ადგილის მოგება შეძლო. აღსანიშნავია, რომ პირველი პიტ სტოპის შემდეგ, ის ხისტი ტიპის საბურავებზე გადავიდა, რამაც საერთოდ არ იმუშავა და ტემპი დაკარგა. ზოგადად, ბაჰრეინში გამოჩნდა, რომ ხისტ საბურავებს ცუდი მოჭიდება ჰქონდა, რაც საკუთარ თავზე ფერარიმაც გამოცადა.
დაძაბული მდგომარეობა სატურნირო ცხრილში
ბაჰრეინის გრან პრის დასრულების შემდეგ, სატურნირო ცხრილში სიტუაცია კიდევ უფრო დაიძაბა — გამარჯვების შემდეგ, პიასტრიმ მეორე პოზიციაზე აინაცვლა და ლანდო ნორისს მხოლოდ 3 ქულით ჩამორჩება. ერთი პოზიცია დაკარგა მაქს ვერსტაპენმა და მე-3 ადგილზე ჩამოქვეითდა, თუმცა, მოქმედი ჩემპიონის ჩამორჩენა მაკლარენთან კვლავ მინიმალურია.
მე-4 ადგილი გაიმყარა ჯორჯ რასელმა, ხოლო ფერარის მრბოლელებმა, შარლ ლეკლერმა და ლუის ჰამილტონმა თითო პოზიციით წაიწიეს წინ და მე-5 და მე-7 ადგილზე იმყოფებიან. მათ შორის კი 30 ქულით კიმი ანტონელია.
ბაჰრეინის გრან პრის დასრულების შემდეგ, გუნდები საუდის არაბეთში გადაინაცვლებენ და ჯედას საერთაშორისო ავტოდრომზე შეეცდებიან წარმატების მიღწევას. საუდის არაბეთის გრან პრი 20 აპრილს, თბილისის დროით 21 საათზე აიღებს სტარტს.
