გასულ კვირას, ლეგენდარულმა ბრაზილიელმა ფეხბურთელმა რონალდინიომ თბილისში, ლეგენდების მატჩზე ითამაშა და ქართველ გულშემატკივარს სანახაობა აჩვენა.
რონალდინიომ ესპანურ გამოცემა Marca-სთან ექსკლუზიური ინტერვიუ ჩაწერა და საინტერესო თემებზე ისაუბრა.
რა გენატრება ყველაზე მეტად საფეხბურთო კარიერიდან?
"ყველაფერი მენატრება, რადგან მთელი ცხოვრება ერთსა და იმავე საქმეს ვაკეთებდი. განსაკუთრებით გასახდელში არსებული ატმოსფერო მენატრება. მიხარია,რომ ახლა მატჩებს ძველ მეგობრებთან ერთად იმ კლუბის მაისურით ვატარებ, რომელთაც ერთადაც ბევრი ლამაზი ისტორია მაკავშირებს."
წლევანდელი ბარსელონა წინა წლებთან შედარებით უკეთესია?
"ბარსელონა ისევ გვახარებს.. მათი ბოლოდროინდელი გამარჯვებები სასიხარულოა. რამდენიმე რთული წლის შემდეგ, კლუბი კვლავ იღიმის და ეს მნიშვნელოვანია."
ბარსელონა რეალზე უკეთესი გუნდია?
"ორივე ფანტასტიკური გუნდია, მაღალი დონის მოთამაშეებით. ამ სეზონში ბარსელონამ რეალი ყველგან დაამარცხა. იმედი მაქვს, ასე გააგრძელებენ."
როგორ ფიქრობთ, რას მიაღწევს ბარსელონას ახალი თაობა?
"იმედი მაქვს, ბარსელონა ძალიან მალე მოიგებს ჩემპიონთა ლიგას. მათ ჰყავთ ახალგაზრდა მოთამაშეები, რომლებიც უშიშრები, თავდაჯერებულები და ნიჭიერები არიან. ეს არის გუნდი, რომელმაც იცის, რისთვის თამაშობს და ფლიკმა მოსვლის დღიდან წარმოუდგენელი სამუშაო გასწია."
ლამინე იამალი 17 წლისაა. ასეთ პატარა ასაკში არც მესი და არც შენ არ იყავით ასეთი კარგები...
"მე და მესიმ უკვე შევქმენით ისტორია, ახლა იამალის ჯერია. ის, რასაც ახლა აჩვენებს, არაჩვეულებრივია - ახალგაზრდა და ამავდროულად ასეთი ნიჭიერი. მისნაირი მოთამაშეების ყურება მსიამოვნებს. იმედია, ჩვენსავით შთამბეჭდავი კარიერა ექნება."
იმსახურებს თუ არა იამალი ოქროს ბურთს?
"იამალი ნამდვილად ოქროს ბურთის სეზონს ატარებს. მსოფლიოში სხვა შესანიშნავი მოთამაშეებიც არიან და ის ამ ელიტურ ჯგუფს მიეკუთვნება. საოცარია, რომ იამალი ასეთი ახალგაზრდაა და უკვე აქვს პოტენციალი, რომ ისტორია შექმნას და ოქროს ბურთი არა ერთხელ, არამედ რამდენჯერმე მოიგოს."
როგორ ფიქრობ, უსამართლობა იყო, როცა შენმა თანამემამულე ვინისიუსნმა გასულ წელს ოქროს ბურთი ვერ მოიგო?
"დიახ, უსამართლობა იყო, რადგან მან წლების განმავლობაში მოიგო უმნიშვნელოვანესი ტიტულები და ჩემპიონთა ლიგის ფინალებში გადამწყვეტი გოლებიც გაიტანა. მან ეს დაიმსახურა."
მოიგებს პსჟ ჩემპიონთა ლიგას?
"იმედი მაქვს, მოიგებს. როცა ევროპაში პირველად ჩამოვედი, პსჟ-მ ძალიან თბილად მიმიღო. ახლა მათ შესანიშნავი მწვრთნელი ჰყავთ, რომელიც ჩემი კარგი მეგობარია და ვფიქრობ, ყველაფერი ნანატრი ჩემპიონთა ლიგის თასით დასრულდება"
ანჩელოტი ბრაზილიის მწვრთნელად. როგორია მოლოდინები?
"მივესალმები. ანჩელოტისთან ერთად ვმუშაობდი და კარგი სპეციალისტია. მისი მოყვანით ბრაზილიის ფეხბურთის ფედერაციამ სწორი გადაწყვეტილება მიიღო. ბედნიერი ვარ და იმედი მაქვს, მსოფლიო ჩემპიონატს მოიგებს."
