ლევან ჩოხელი V ლორენც ლარკინი
ჩოხელი Bellator-ში იბრძვის 2021 წლიდან და ამ დროის განმავლობაში მან ჩაატარა ექვსი ბრძოლა, რომელშიც მოიპოვა ოთხი გამარჯვება და ორი მარცხი. ქართველის საერთო სტატისტიკა კი 13 მოგებასა და 2 წაგებას შეადგენს. საკმაოდ დიდია იმის ალბათობა, რომ ლარკინის დამარცხების შემთხვევაში, ლევანის შემდეგი ბრძოლა უკვე საჩემპიონო იქნება.
აღნიშნული ინფორმაცია თავად 27 წლის მებრძოლმა გააჟღერა - "დადგა ბრძოლის კვირაც, მოუთმენლად ველი. როგორც იცით, ეს ბრძოლა გადაწყვეტს, ვინ იქნება პირველი კონტენდერი. შესაბამისად, ამ ბრძოლაში გამარჯვების შემდეგ, ვიბრძოლებ ქამრისთვის. გავაკეთებ ჩემს მაქსიმუმს იმისთვის, რომ გავიმარჯვო ამ ბრძოლაში და შემდეგ ქამარი საქართველოში ჩამოვიტანო", - განაცხადა ჩოხელმა.
რაც შეეხება ქართველი მებრძოლის მოწინააღმდეგეს, ლორენცი თავის საქმეში საკმაოდ გამოცდილია, მის ანგარიშზე 34 ბრძოლაა, აქედან 26 მისი გამარჯვებით დასრულდა. ამერიკელს სხვადასხვა დროს ხორხე მასვიდალისა და რობი ლოულერისთვისაც კი მოუგია. რაც შეეხება მის ძლიერ მხარეს, მოგებების 54% მან ნოკაუტითა და ტექნიკური ნოკაუტით მოიგო.
ნოკაუტით გამარჯვება ლევანის ძლიერი მხარეც არის (77%). როგორც აღვნიშნეთ, თავისი 38 წლის მოწინააღმდეგის დამარცხების შემთხვევაში, მისი შემდეგი ბრძოლა დიდი ალბათობით საჩემპიონო იქნება. რაც შეეხება Bellator-ის ქვესაშუალო დივიზიონის მოქმედ ჩემპიონს: რამაზან კურამაგომედოვი. როგორც ვხედავთ, პერსპექტივაში ქართულ-დაღესტნური ბრძოლა გვაქვს.
ოთარ თანზილოვი V ჯოსიას მუსასა
შანსი, რომელიც თანზილოვისთვის შესაძლოა UFC-სთან გაფომრებული კონტრაქტით დაგვირგვინდეს. ამისთვის მას სჭირდება მუსასას დამარცხება, თანაც შთამბეჭდავად და დასამახსოვრებლად, ისე რომ დანა უაიტს მოეწონოს. ქართველი მებრძოლი ამ დროისთვის წაუგებელია, მის ანგარიშზე საერთო ჯამში 9/9 მოგება არის.
ნიჭიერი სტრაიკერი, რომლის გამარჯვევების 78 პროცენტი ნოკაუტით არის. ყველაზე გამოსარჩევი კი არის ის, რომ ოთარიმ თავის ანგარიშზე ხუთი ნოკაუტი პირველ რაუნდშივე ჩაიწერა. ერთი სიტყვით, 26 წლის მებრძოლს მსოფლიოს ყველაზე პოპულარულ ორგანიზაციაში კონტრაქტის მოსაპოვებლად ყველაფერი აქვს.
რაც შეეხება თანზილოვის მოწინააღმდეგეს, მუსასა ასევე დაუმარცხებელია, მის ანგარიშზე შვიდიდან შვიდი გამარჯვებაა, თანაც ყველა ნოკაუტით. ექვსი აქედან იყო პირველ რაუნდში, ერთი კი მეორე რაუნდში. ქართველი და კონგოელი სუპერ მსუბუქი დივიზიონის მებრძოლები სტილით ჰგვანან ერთმანეთს, ვნახოთ, რა იქნება უშუალოდ ოქტაგონზე.
საინტერესო არის ისიც, რომ ახალგაზრდა მებრძოლების უკან UFC-ის დიდი ვარსკლავები დგანან. ოთარი ამერიკის შეერთებულ შტატებში ჩაფრინდა ივლისში და მის მომზადებაზე პირადად იზრუნა მერაბ დვალიშვილმა, ჯოსიასს კი მხარდაჭერა კამარუ უსმანმა გამოუცხადა.
