თამაშების გადადება საქართველოში: გადაუჭრელი პრობლემა, რომელიც ყოველ წელს ხდება

საქართველოს თასის 1/8 ფინალში დინამო თბილისი იბერიას, დინამო თბილისი 2 კი ქუთაისის ტორპედოს დაუპირისპირდება.

ისე დაემთხვა, რომ დინამოს ძირითადი და ასაკობრივი გუნდები ერთ დღეს იმ კლუბებს ეთამაშებიან, რომელთაც რამდენიმე დღეში ევროტურნირებზე მნიშვნელოვანი მატჩები აქვთ.

დიდი აჟიოტაჟი გამოიწვია იმ ფაქტმა, რომ დინამო თბილისმა ქართული ფეხბურთისთვის ამ მნიშვნელოვან დროს, იგულისხმება ევროტურნირები, ტორპედოსა და იბერიას თამაშები არ გადაუდო.

თუმცა ამის გამო დინამო თბილისისა და ზოგადად, ნებისმეირი გუნდის დადანაშაულება და კრიტიკა უსაფუძვლოა. პირველ რიგში იმიტომ, რომ გასულ წლებში თავად დინამო იყო მდევრის როლში და როცა ისინი სხვა მნიშვნელოვანი მატჩების წინ გუნდებს თამაშების გადადების თხოვნით მიმართავდნენ, უარს იღებდნენ.

მაგალითად, 2019 წელს, ევროპა ლიგის საკვალიფიკაციო ეტაპზე დინამო თბილისი 1-კვირიან შუალედში ფეიენოორდს 2-ჯერ უპირისპირდებოდა, შუაში ლოკომოტივთან მატჩი იყო და მიუხედავად თხოვნისა, ლოკომოტივმა ამ მატჩის გადადებაზე უარი თქვა. ცნობისთვის, ის თამაში დინამომ 6:0 მოიგო.

ანალოგიური სიტუაცია იყო 2020 წელსაც. ამჯერად, უარი იბერიამ (მაშინდელი საბურთალო) განაცხადა. მით უმეტეს, იმ დროს კორონავირუსი იყო და სიტუაცია ისედაც გართუულებული იყო, თუმცა იბერიამ დინამოს ეს თხოვნა არ გაითვალისწინა.

გავიხსენოთ გასული წლის ფაქტი, როცა იბერიას ხელმძღვანელობამ გორის დილას თამაშის გადადებაზე უარი უთხრა. დილა მაშინ ერთადერთი ქართული კლუბი იყო, რომელიც ევროტურნირებზე შემორჩა.

კიდევ უფრო ცუდი ისაა, რომ ყველა შემთხვევაში, როცა ქართულმა კლუბებმა ამა თუ იმ თამაშის გადადება ითხოვეს და უარი მიიღეს, ეს ყველაფერი ევროტურნირების შედეგებზეც უარყოფითად აისახა.

ზემოთ ნაჩვენები ფაქტებიდან გამომდინარე, ვხედავთ, რომ მას შემდეგ, რაც ეროვნული ჩემპიონატი გაზაფხული-შემდგომის ფორმატზე გადავიდა, ყოველ წელს ეს პრობლემაა. რეალურად, ფორმატის ცვლილების მთავარი მიზანი ის იყო, რომ ქართული კლუბები ევროტურნირებს კარგ ფორმაში შეხვედროდნენ, თუმცა წელი არ გავა, როცა მჭიდრო გრაფიკის გამო, თამაშების გადადების პრობლემა იქმნება.

ამ შემთხვევაში, უნდა გამოინახოს ალტერნატივა, რომელიც ყველასთვის მისაღები იქნება. სეზონის წინ, იმ წლიურ გრაფიკზე, რაც გუნდებს აქვთ, ყველა ერთად თანხმდება, თუმცა როცა საქმე ევორტურნირებამდე მიდის, მჭიდრო გრაფიკის პრობლემები იქმნება. თუ გუნდი თამაშის გადადებაზე უარს ამბობს, ამის გამოც არ უნდა დავადანაშაულოთ, რადგან ყველა კლუბს თავისი გაწერილი გრაფიკი და გეგმა აქვს.