ველორბოლა გოგოებსა და ბიჭებს შორის სხვადასხვა კატეგორიაში გაიმართა. შეჯიბრი მოიცავდა წრიულ რბოლას, რამდენიმე შუალედური ფინიშით, გამარჯვებულები გამოვლინდნენ ჯამურად დაგროვებული ქულებით და დაჯილდოვდნენ სხვადასხვა პრიზებით.
ღონისძიებას დაესწრო ოლიმპიური ჩემპიონი, საქართველოს ეროვნული ოლიმპიური კომიტეტის ვიცე-პრეზიდენტი, ლეგენდარული ტყვიის მსროლელი ნინო სალუქვაძე, რომელმაც მონაწილეობა მიიღო ვაჟთა კატეგორიაში გამარჯვებული სამეულის დაჯილდოების ცერემონიალში, სეოკ-ის ვიცე-პრეზიდენტმა, გამარჯვებულ პირველ სამეულს საქართველოს ეროვნული ოლიმპიური კომიტეტისგან სამახსოვრო საჩუქრები გადასცა.
შეჯიბრი საქართველოს ველოსპორტის ეროვნული ფედერაციის ინიციატივითა და ორგანიზებით, კულტურისა და სპორტის სამინისტროს, თბილისის მერიის და საბურთალოს რაიონის გამგეობის მხარდაჭერით ჩატარდა. ორგანიზატორთა გადაწყვეტილებით, ლეგენდარული ქართველი ველომრბოლელის სახელობის ტურნირი ყოველწლიურად გაიმართება.
ლეგენდარული ომარ ფხაკაძე:
XX ოლიმპიური თამაშების ბრინჯაოს მედალოსანი (1972, მიუნხენი);
მსოფლიოს ჩემპიონი (1965);
ვერცხლის (1969) და ბრინჯაოს პრიზიორი (1966);
XVIII და XIX ოლიმპიური თამაშების მონაწილე;
კოპენჰაგენის, ამსტერდამის, ტულის საერთაშორისო ტურნირებში გამარჯვებული, მსოფლიოს ორგზის რეკორდსმენი, სსრკ და საქართველოს წლის საუკეთესო სპორტსმენი (1965); სხვა მრავალი ტურნირის გამარჯვებული და პრიზიორი.
ომარ ფხაკაძე სპორტის დამსახურებული ოსტატი, საქართველოს დამსახურებული მწვრთნელი, საქართველოს ველოსპორტის ფედერაციის პრეზიდენტი იყო (1986-1993წწ.), გადაღებულია ქართულ ფილმში "ხარება და გოგია", რომელშიც ასრულებს ერთ-ერთი მთავარი გმირის - ხარებას როლს. გარდაიცვალა 1993 წელს.
