პარიზში გამართულ პარალიმპიურ თამაშებზე საქართველოს დელეგაციამ რეკორდული რაოდენობის, 9 მედალი მოიპოვა, რაც ჩვენი ქვეყნისთვის ისტორიული შედეგია. ქართველი პარაძიუდოისტების ანგარიშზე 4 მედალია, ტატამიზე პირველი ზურაბ ზურაბიანი (-60კგ. კატეგორია J2) გავიდა, ფინალში იასპარეზა, რამდენიმე წამი ჩემპიონობაც იზეიმა, თუმცა მსაჯებმა წესების დარღვევა დააფიქსირეს და ქართველი საბოლოოდ ვერცხლის მედალს დაეუფლა.
24 წლის ზურაბმა ძიუდოზე ვარჯიში 12 წლისამ დაიწყო. პარაძიუდოში კი 5 წელია ჩაერთო. პარალიმპიური მედალი, სპორტი და პარიზული გამოცდილება, - ამ თემების შესახებ, ზურაბ ზურაბიანმა LaGazzetta.ge-სთან ინტერვიუში ისაუბრა:
- ვერცხლის მედალი მოვიპოვე, რაც ასევე სასიხარულო შედეგია. ნამდვილად დაძაბული ფინალი მქონდა და ვიტყოდი რომ დღის საუკეთესო შეხვედრაც კი იყო სანახაობის მხრივ. უზბეკმა მეტოქემ მეორე წუთზე ვაზარზე დამაგდო, რასაც მოჰყვა ჩემი მრავალი შეტევა და ბოლო დარჩენილ 30 წამში ხელის მტკივნეულის გაკეთება მოვახერხე და მეტოქეც დამნებდა, იპონიც მომცეს და გამარჯვებაც, მაგრამ ჩემი ჩემპიონობის სიხარული სულ 20 წამს გაგრძელდა, რადგან ვიდეო რეფერიმ განაცხადა, რომ ჭიდაობის დროს წესი დავარღვიე და გამარჯვება გამიუქმეს. ბოლოს დარჩენილ წამებში ყველაფერი ჩავდე და ვეცადე, მაგრამ მეორედ გამარჯვება ვეღარ შევძელი. საერთო ჯამში, არაფერზე არ მწყდება გული და სიამოვნებაც მივიღე იმით, რომ ვიბრძოლე, ჩემი მაქსიმუმი ჩავდე და ბოლომდე დავიხარჯე.
- პარალიმპიურ თამაშებზე საუკეთესო პარაძიუდოისტები არიან, ვინ იყო ყველაზე რთული მეტოქე შენთვის და რომელ დაპირისპირებას გამოარჩევ?
- ყველა საუკეთესო პარაძიუდოისტი იყო პარალიმპურ თამაშებზე. გამორჩეულად ვერავის გამოვყოფ. ჩემთვის, უზბეკი იყო ცოტა უხერხული მეტოქე და დაძაბულ შეხვედრადაც ფინალს დავასახელებ.
- ქართველების წარმატებული ასპარეზობა შენთვის დამატებითი მოტივაცია იყო?
- კი ნამდვილად დამატებითი მუხტი იყო, მედალოსნების გაზიარებული გამოცდილება ჩვენც დაგვეხმარა.
- საქართველოში პარაძიუდოში შიდა კონკურენციაზე რას იტყვი?
- პარაძიუოში თითქმის ყველა წონაში საკმაოდ ძლიერი კონკურენციაა და ეს ჩვენ მიერ მოპოვებულ პარალიმპიურ ლიცენზიებზეც აისახა.
- ამჯერად რისთვის იწყებ მზადებას?
- ამ ეტაპზე დროებით ვისვენებთ. საჭიროცაა, რომ ამ ყველაფრისგან ორგანიზმმა და გონებამაც დაისვენოს. მალე აქტიურ ვარჯიშს დავუბრუნდებით და მომავალ წელს გასამართი ევროპისა და მსოფლიოს ჩემპიონატებისთვის მოვემზადებით.
- რას ეტყვი გულშემატკივარს?
- დიდი მადლობა ყველას, ვინც გვგულშემატკივრობდა და მხარში გვედგა, ეს ჩვენთვის დამატებით მუხტია, რაც ძალიან მნიშვნელოვანია.
- რამდენად მნიშვნელოვანია ჯანსაღი და აქტიური ცხოვრება?
- ძალიან მნიშვნელოვანია, ვიტყოდი, რომ საჭიროა - რეჟიმის დაცვა, დისციპლინა, დაუღალავი შრომა, გონებრივი და მენტალური განვითარება, მაქსიმალური კონცენტრირება საქმეზე, რომელსაც ვაკეთებთ.
- რა მოგცა პარალიმპიადამ და ეს წარმატება არის თუ არა დამატებითი მოტივაცია შემდეგი გამარჯვებებისთვის?
- პარალიმპიადამ და მოპოვებულმა ვერცხლის მედალმა 24 წლის ასაკში მომცა საშუალება, რომ რაღაც დიდის ნაწილი გავმხდარიყავი, რაც ძალიან ბედნიერს მხდის. ჩემპიონობასაც კი გავუგე გემო რამდენიმე წამით, რის გამოც მოუთმენლად ველი 2028 წლის თამაშებს, რათა საბოლოოდ გავხდე ჩემპიონი და დავეუფლო ოქროს მედალს. მოუთმენლად ველი როდის გავაგრძელებ ვარჯიშს ახალი მიზნებისთვის.
