ხულიან ალვარესი
ალვარესმა თავისი კარიერის განმავლობაში უკვე მოასწრო მსოფლიო ჩემპიონატის, ჩემპიონთა ლიგის, პრემიერ ლიგის, კოპა ამერიკას და კიდევ არაერთი ჯილდოს მოგება. დგება ოლიმპიადის ჯერი, სადაც არგენტინა იქნება ერთ-ერთი ფავორიტი, ხულიან კი ეროვნული გუნდის ლიდერი. არაა გამორიცხული, რომ ამ ტურნირის შემდეგ, მანჩესტერ სიტის ფორვარდი სხვა კლუბშიც ვიხილოთ.
რაიან ჩერკი
ფრანგული ფეხბურთის ამომავალი ვარსკვლავი, რომელსაც მთავარ ნაკრებში ჯერჯერობით არ უთამაშია. ოლიმპიურ თამაშებზე თავის გამოჩენა იქნება კარგი წინაპირობა "მამლების" მთავარ ეროვნულ გუნდში დამკვიდრებისთვის. როგორც ვიცით, ჩერკი თამაშობს ლიონში, სადაც ცოტა ხნის წინ, ჟორჟ მიქაუტაძე დაბრუნდა.
პაუ კუბარსი
კუბარსიმ 17 წლის ასაკში ამოყო თავი ბარსელონას სასტარტოსა და ესპანეთის გაფართოებულ შემადგენლობაში ევროპის ჩემპიონატისთვის. სამწუხაროდ, ევრო 2024-ზე პაუ არ წაიყვანეს, მაგრამ ოლიმპიადაზე ის აუცილებლად ითამაშებს. შესაძლოა, ჩვენს თვალწინ მართლაც მწიფდებოდეს კატალონიური კლუბისა და "ფურია როხას" მომავალი ლიდერი.
ფერმინ ლოპესი
ბარსელონას კიდევ ერთი აღზრდილი, რომელმაც განვლილ საკლუბო სეზონში ჩაატარა 42 შეხვედრა და გაიტანა 11 გოლი. აღსანიშნავია ის, რომ ფერმინი ესპანეთის ეროვნული გუნდის წევრიც იყო ევრო 2024-ზე. ლოპესს აქვს შესანიშნავი შესაძლებლობა ერთ ზაფხულს ორი დიდი საერთაშორისო ტურნირის მოგების.
ერიკ გარსია
გარსია თამაშობდა ბარსელონასა და სიტის აკადემიებში, თუმცა მთავარ გუნდებში დამკვიდრება მან ვერ მოახერხა. განვლილი საკლუბო სეზონი მან ჩაატარა ჟირონაში, რის შემდეგაც ის კატალონიაში დაბრუნდა. ერიკის კარიერის სჭირდება რეანიმირება და ვინ იცის, იქნებ ოლიმპიადა ამ ყველაფრის დასაწყისიც გახდეს.
აშრაფ ჰაკიმი
ოლიმპიური თამაშების შეიძლება ითქვას, რომ ყველაზე დიდი ვარსკვლავი. ჰაკიმიმ მაროკოსთან ერთად ერთხელ უკვე აალაპარაკა საფეხბურთო სამყარო, როდესაც 2022 წლის მუნდიალზე 1/2 ფინალში გავიდა. დგება ოლიმპიადის ჯერი, სადაც აშრაფი როგორც დიდი საფეხბურთო ვარსკვლავი ყურადღების ცენტრში იქნება.
მოჰამედ ელნენი
სალაჰის არყოფნაში ეგვიპტის ნაკრების ლიდერი იქნება სხვა მოჰამედი - ელნენი. ეროვნული გუნდის კაპიტანი და საოცრად გამოცდილი ფეხბურთელი, ყველაფერი ეს ლონდონის არსენალის ყოფილი ჩამშლელის შესახებ არის. როგორც ვიცით, განვლილი სეზონის დასრულებისთანავე, მან ინგლისური კლუბი დატოვა.
ალექსანდრ ლაკაზეტი
საფრანგეთის ოლიმპიური ნაკრების კაპიტანი და ყველაზე გამოცდილი ფეხბურთელი. ასევე მიქაუტაძის მომავალი მეწყვილე ლიონის თავდასხმაში. ათნომრიანი მაისურიც მიიღო ლაკაზეტმა, რომელსაც შესანიშნავი შანსი აქვს იმის, რომ კარიერის დასკვნითი ნაწილი "მამლებში" დასამახსოვრებლად გაატაროს.
მაიკლ ოლისე
ინგლისში დაბადებული ფეხბურთელი, რომელმაც სხვადასხვა დროს სიტის, არსენალისა და ჩელსის აკადემიებში ითამაშა. კრისტალ პალასში ჩატარებული ძალიან კარგი სეზონის შემდეგ კი ოლისე 60 მილიონად ბაიერნში გადავიდა. ლაკაზეტი თუ არის ყველაზე გამოცდილი ფრანგებს შორის, მაიკლი მთავარი იმედი იქნება.
ნიკოლას ოტამენდი
აღნიშნული ათეული წარმოუდგენელი იქნებოდა ოტამენდის გარეშე, რომელიც მსოფლიო ჩემპიონატისა და ორი კოპა ამერიკას შემდეგ, ეცდება ოლიმპიური თამაშების მოგებასაც, თანაც არგენტინის ეროვნული გუნდის კაპიტნის რანგში. როგორც ვხედავთ, 36 წლის ნიკოლასი კარიერის დასრულებას ჯერ სულაც არ ჩქარობს.
ასევე გამოსარჩევია - არგენტინის ნაკრებში 10 ნომერი იქნება საბა ლობჟანიძის ყოფილი თანაგუნდელი, ტიაგო ალმადა, რომელიც ივლისის დასაწყისში ატლანტადან ბოტაფოგოში გადავიდა. "ალბისელესტეს" მხრიდან ასევე გამოსარჩევია დიეგო სიმეონეს შვილი, ჯულიანო სიმეონე, რომელმაც გასული სეზონი ალავესში ჩაატარა.
განვლილ საკლუბო სეზონში გამორჩეული იყო ჟან-ფილიპ მატეტა, რომელმაც კრისტალ პალასის მაისურით 19 გოლი გაიტანა. ოლიმპიურ თამაშებზე ისიც იქნება. ტურნირზე ასევე იქნება რამდენიმე მივიწყებული სახელი: ნაბი კეიტა, რომელიც ლივერპულიდან გადავიდა ვერდერში, ასევე ყოფილი ბარსელონელები: ხუნიორ ფირპო, სერხიო გომესი, ხუან მირანდა და ილაიშ მორიბა.
