მარკუს რაშფორდი - ფეხბურთელი რუბენ ამორიმის გეგმებში არ შედის, მანჩესტერ იუნაიტედი კი ინგლისელი შემტევის გაყიდვას იანვარში შეეცდება. ამ მომენტისთვის უცნობია რომელი გუნდები ინტერესდებიან 27 წლის ფეხბურთელით, თუმცა უახლოეს დღეებში რაშფორდის პოტენციურ ტრანსფერთან დაკავშირებით უფრო მეტ ინფორმაციას შევიტყობთ.
ბენ ჩილველი - მას შემდეგ, რაც ენცო მარესკამ ჩელსი ჩაიბარა, იტალიელმა დიდი ცვლილებები დაანონსა. იტალიელი სპეციალისტის გადაწყვეტილებით, კლუბმა რამდენიმე ფეხბურთელი ტრანსფერზე დააყენა და ამ სიაში მოხვდა ბენ ჩილველიც, რომელიც ბოლო წლებში ჩელსის ერთ-ერთი ლიდერი იყო. ინგლისელი ფეხბურთელის აგენტი ახალ გუნდს უკვე ეძებს — განიხილება როგორც პრემიერ ლიგაში დარჩენა, ისე სხვა ჩემპიონატში გადაბარგებაც. 28 წლის განაპირა მცველი ჩელსის უახლოეს დღეებში აუცილებლად დატოვებს.
მატეუს კუნია - პრემიერ ლიგის 2024/25 სეზონის ერთ-ერთი მთავარი აღმოჩენა, ფეხბურთელი რომელიც ვულვზის უდავო ლიდერია და ახლა რომ გუნდი გასავარდნ ზონაში არ არის, დიდწილად სწორედ ბრაზილიელი შემტევის დამსახურებაა. 25 წლის ფეხბურთელს საოცარი სეზონი აქვს, რის ფონზეც მის გარშემო საუბრები არ წყდება. იმის მიუხედავად, რომ ვულვზი კუნიას გაშვებას არ განიხილავს, უახლოეს დღეებში ბრაზილიელის პოტენციური ტრანსფერი გამორიცხული მაინც არ არის. საქმეშია არსენალი და ასევე მოსალოდნელია სხვა კლუბების გააქტიურებაც.
ჯოშუა ზირკზე - ზაფხულის სატრანსფერო ფანჯრის ერთ-ერთი ყველაზე ცუდი გარიგება! ფეხბურთელი, რომელიც მანჩესტერ იუნაიტედში ურთულეს პერიოდს განიცდის, დიდი შანსია უახლოეს დღეებში სხვა გუნდში ვიხილოთ. რომ არა ნიდერლანდელის აგენტი, ზირკზე ახლა მილანის ფეხბურთელი იქნებოდა და დიდი შანსია მისი კარიერა სულ სხვანაირად განვითარებული, თუმცა ახლა მის გარშემო საუბრები არ წყდება. 23 წლის ფეხბურთელით იუვენტუსი და ნაპოლი ინტერესდებიან, მოსალოდნელია ასევე სხვა კლუბების გააქტიურებაც. იმის მიუხედავად, რომ რუბენ ამორიმი ფეხბურთელს მხარს ბოლომდე უჭერს, მაინც დიდია იმის ალბათობა, რომ იანვარში ნიდერლანდელი ოლდ ტრაფორდს დატოვებს.
რანდალ კოლო მუანი - პსჟ-ში დიდი ცვლილებები დაანონსდა! პარიზელები სეზონის ბოლოს არ დაელოდებიან და რამდენიმე ფეხბურთელის გაყიდვას იანვარშივე შეეცდებიან. ამ სიაშია რანდალ კოლო მუანიც, რომელსაც ლუის ენრიკესთან კონფლიქტი აქვს, შესაბამისად მისი გუნდიდან წასვლა უბრალოდ დროის ამბავია. 26 წლის ფორვარდით ნახევარი ევროპა ინტერესდება — ჩელსი, მილანი, იუვენტუსი, ბაიერნი, ტოტენჰემი, არსენალი... ყველა საქმეშია, ყველას ინტერესი რეალურია, თუმცა ამ მომენტისთვის ფავორიტის გამორჩევა გაგვიჭირდება. უახლოეს დღეებში ფრანგი ფორვარდის თაობაზე უფრო მეტ ინფორმაციას შევიტყობთ.
მილან შკრინიარი - სლოვაკი ფეხბურთელიც იმ სიაში მოხვდა, რომელშიც რანდალ კოლო მუანი — ფეხბურთელი პსჟ-ს 100% დატოვებს. გამოცდილი ცენტრალური მცველით რამდენიმე კლუბი ინტერესდება, თუმცა ყველაზე მეტად გალათასარაი აქტიურობს. განიხილება იტალიური და ინგლისური კლუბების ვარიანტიც. უახლოეს დღეებში 29 წლის მცველის პოტენიცურ ტრანსფერთან დაკავშირებით უფრო მეტ ინფორმაციას შევიტყობთ.
ანტონი - მისი მანჩესტერული კარიერა ძალიან ცუდად განვითარდა. ბრაზილიელ ვინგერს არც მთავარი მწვრთნელის შეცვლამ უშველა და ამის ფონზე, კლუბი მის გაყიდვას სერიოზულად განიხილავს. ყველაზე მეტად ბეტისი აქტიურობს, თუმცა მოსალოდნელია სხვა კლუბების გააქტიურებას. იმის მიუხედავად, რომ ფეხბურთელს არ სურს ოლდ ტრაფორდის დატოვება, გუნდი მის სანაცვლოდ ყველა შეთავაზებას განიხილავს.
დანი ოლმო - ესპანელი ფეხბურთელის ქეისი სრულიად განსხვავებულია. ბარსელონა 26 წლის ფეხბურთელს ამ დრომდე ვერ არეგისტრირებს და თუ უახლოეს 48 საათში კატალონიურმა კლუბმა ეს პრობლემა ვერ მოაგვარა, ფეხბურთელი გუნდს დიდი ალბათობით დატოვებს. დიდი შანსია ეს არ იყოს პირდაპირი ტრანსფერი და ოლმომ გუნდი მხოლოდ 6-თვიანი იჯარით დატოვოს. იმის მიუხედავად, რომ ფეხბურთელი ბარსელონაში ბედნიერია, ზაფხულამდე უსაქმოდ ყოფნა მის გეგმებში ნამდვილად არ შედის. უახლოეს დღეებში ესპანელის გარშემო უფრო მეტ ინფორმაციას შევიტყობთ.
დანილო - ბრაზილიელი კაპიტანი ტურინულ გრანდს 100% დატოვებს. გადაწყვეტილება საბოლოოა და გადახედვას აღარ ექვემდებარება. 33 წლის ფეხბურთელი ტიაგო მოტას გეგმებში აღარ შედის, მეტიც, დანილო სუპერ თასის განაცხადშიც კი ვერ მოხვდა. დიდი ალბათობით ფეხბურთელი სერია ა-ში დარჩება და კარიერას ნაპოლიში გააგრძელებს. მხარეები ბოლო დღეებია ტრანსფერის ბოლო დეტალებს აგვარებენ და თუ ბოლო მომენტში რაიმე განსაკუთრებული არ მოხდება, ეს გარიგება აუცილებლად შედგება.
ფედერიკო კიეზა - იტალიელი გარემარბის შესახებ რამდენიმე დღის წინ უკვე ვისაუბრეთ. ფეხბურთელის ლივერპულში ადაპტაცია კვლავ გრძელდება, რაც ფედეს გარშემო საუბრების მიზეზად იქცა. არნე სლოტი ფეხბურთელს არ ენდობა, რის გამოც იტალიელს სამატჩო განაცხადშიც კი ვერ ვხედავთ ხოლმე. თუ სიტუაცია უახლოეს დღეებში არ შეიცვლება, დიდია იმის ალბათობა, რომ კიეზამ გუნდის დატოვება მოითხოვოს.
