მიუხედავად იმისა, რომ სეზონი ჯერ ახალი დაწყებულია, უკვე ბევრი რამ ვიხილეთ და არიან გამორჩეული ფეხბურთელები, რომლებიც უკვე შეიძლება მოვიაზროთ მომავალი ოქროს ბურთის სავარაუდო ნომინანტებად.
მიუნხენის ბაიერნის ფორვარდი ჰარი კეინი, მანჩესტერ სიტის ვიკინგი ერლინგ ჰოლანდი და მადრიდის რეალის მთავარი ლიდერი კილიან მბაპე წელს საოცარ შედეგებს აფიქსირებენ.
16 მატჩი 25 გოლი - ეს ჰარი კეინის სტატისტიკაა. აგვისტოს შემდეგ მას გოლი თითქმის ყველა მატჩში გააქვს. ვინსენტ კომპანიმ კეინს ახალი პოზიცია შეურჩია, შედარებით უკნიდან თამაშობს და პასებსაც ანაწილებს და გოლებსაც იტანს.
აღსანიშნავია, რომ ბოლო ორ თვეში კეინმა დუბლი 7 შეხვედრაში შეასრულა, ჰეთ-თრიკი კი ორ მატჩში. ის სანაკრებო მატჩებშიც გამოირჩა და ცოტა ხნის წინ ლატვიას ორი გოლი გაუტანა.
ერლინგ ჰოლანდს გოლი უკვე ზედიზედ 12 მატჩია გააქვს და მისი შემჩერებელი არავინაა. აგვისტოს შემდეგ ერლინგსაც 25 გოლი აქვს გატანილი, მათ შორის, გასულ თვეში ნორვეგიის ნაკრების მაისურით მოოლდოვას 5 ბურთი გაუტანა.
ჰოლანდი გახდა ფეხბურთელი, რომელიც ჩემპიონთა ლიგაზე 50 გოლიან ნიშნულამდე ისტორიაში ყველაზე მალე ავიდა. მან გუშინ ვილიარეალსაც გაუტანა და საუკეთესო ბომბარდირთა შორისაა როგორც ჩემპიონთა ლიაზე, ისე პრემიერ ლიგაში.
კილიან მბაპეს უკვე 20 გოლი აქვს გატანილი. აგვისტოს შემდეგ მან გოლი აბსოლუტურად ყველა მატჩში, ყველა ტურნირზე გაიტანა. ერთადერთი უგოლო შეხვედრა მას მალიორკასთან ჰქონდა, იქაც ორი ბურთი გაიტანა და ორივე ვიდეო-რეფერიმ გაუუქმა.
პირველი არც თუ ისე წარმატებული სეზონის შემდეგ, მეორე სეზონში მბაპე რეალის ნამდვილ ლიდერად იქცა, 5 გოლით ჩემპიონთა ლიგის ერთპიროვნული ბომბარდირია, 10 გოლით კი ლა ლიგას ლიდერობს.
ბოლო 2 თვეში მბაპემ ოთხჯერ შეძლო დუბლის შესრულება. მან სანაკრებო ასპარეზზეც გაიბრწყინა და აზერბაიჯანთან გოლითა და საგოლე გადაცემით გამოირჩა.
საინტერესოა, ვინ შეაჩერებს ამ საოცარ ფორმაში მყოფ სამეულს, ვინ უფრო დიდხანს შეინაჩუნებს სტაბილურობას და სეზონის ბოლოს, ვინ დაეუფლება ტიტულებს და ნანატრ ოქროს ბურთს, რომელიც ჯერ არც მბაპეს მოუგია, არც ჰოლანდს და არც კეინს.
