გახსოვთ ლიონელ მესის სადებიუტო გოლი ინტერ მაიამის მაისურით? ეს იყო ჯარიმა, რომელიც ლეგენდარულმა ფლეიმეიქერმა მლს-ის ლიგის თასზე კრუს ასულს გაუტანა. ცოტა ხნის წინ, არგენტინელმა შემტევმა გაიტანა მორიგი სტანდარტი, თანაც საჩემპიონო. დიახ, მისი დუბლით, ფლორიდელებმა მოუგეს კოლამბუს ქრიუს და ჩემპიონობა იზეიმეს.
"ვაის სითის" კაპიტანს კარიერის განმავლობაში უკვე დაუგროვდა 66 გატანილი ჯარიმა და ამ მაჩვენებლით მან გადაასწრო თავისი კლუბის მფლობელს, დევიდ ბექჰემს, რომლის ყველაზე ძლიერი მხარე საფეხბურთო კარიერის დროს სწორედ სტანდარტულები იყო. კიდევ ერთი საინტერესო ფაქტი: ლეგენდარული 10-იანი რონალდინიო გაუჩოსა და ვიქტორ ლეგროტალიეს გაუთანაბრდა.
"ლა პულგაზე" წინ არის მხოლოდ ორი ფეხბურთელი - ედსონ არანტეს დო ნამისმენტო პელე (70 ჯარიმა) და ჟუნინიო პერნამბუკანო (77 ჯარიმა). როგორც ვხედავთ, 37 წლის ფლეიმეიქერს ახალ რეკორდამდე ზუსტად შესრულებული 12 სტანდარტული აშორებს. რაც შეეხებათ იმ მოთამაშეებს, რომლებიც მან უკვე ჩამოიტოვა, სია მართლაც შთამბეჭდავია.
ლეგენდარული ინგლისელი ნახევარმცველის გარდა, მესის უკან დარჩნენ კრიშტიანუ რონალდუ (64 ჯარიმა), დიეგო მამარადონა (62 ჯარიმა), ზიკო კოიმბრა (62 ჯარიმა), რონალდ კუმანი (60 ჯარიმა) და სხვები. სტანდარტულების შემსრულებელთა საუკეთესო 10-ეულში მოქმედი მოთამაშეები მხოლოდ არგენტინელი და პორტუგალიელი ფორვარდები არიან.
მათ შორის სხვაობა სულ რაღაც ორი გოლია, თუმცა აღსანიშნავია ის ფაქტი, რომ ალ ნასრის კაპიტანი ჯარიმებს არც ისე ხშირად იტანს. აქედან გამომდინარე, საკმაოდ მაღალია იმის ალბათობა, რომ ლეო ლეგენდარულ მე-7 ნომერზე წინ დარჩება. სხვა მოქმედი მოთამაშეები კი რამდენიმე 10-ეული ბურთით არიან ჩეის სთეიდიუმის ბინადართა კაპიტნის უკან.
რაც შეეხება, ინტერის ათიანის სტატისტიკას - ჯარიმების უმეტესობა მან გაიტანა თავისი კარიერის მთავარ გუნდში, ბარსელონაში. უფრო კონკრეტულად კი 50 დარტყმა, რაც "ლა პულგას" სტანდარტებით გატანილი ბურთების თითქმის 76%-ია. პირველი ჯარიმა მან გაიტანა მადრიდის ატლეტიკოს კარში, ბოლო დარტყმა ვალენსიასთან მოხდა.
მივადექით 37 წლის შემტევის პარის სენ-ჟერმენში გატარებულ პერიოდს, რომლის დროსაც მან ორი ჯარიმა გაიტანა. სამი სტანდარტულის გოლად გარდასახვა მოხდა მაიამიში, დანარჩენი 11 ბურთი კი მესიმ არგენტინის ეროვნული გუნდის რიგებში გაიტანა. ახლოვდება კარიერის დასასრული, რეკორდამდე 12 ჯარიმაა, ვნახოთ, რას იზამს არგენტინელი ფლეიმეიქერი.
