ბარსელონაში მომდევნო სეზონისთვის მზადება უკვე დაიწყეს. იმის მიუხედავად, რომ კლუბში ფინანსური პრობლემები კვლავ რჩება, "ბლაუგრანას" წინ მაინც დატვირთული ზაფხულის სატრანსფერო ფანჯარა ელოდება.
როგორც კლუბთან დაახლოებული წყაროები წერენ, ჰანსი ფლიკის გუნდი ახალი სეზონის წინ მინიმუმ 5 ახალ ფეხბურთელს დაიმატებს, საიდანაც ერთ-ერთი აუცილებლად ფორვარდი იქნება.
როგორც არაერთხელ დავწერეთ, #1 სამიზნე ხულიან ალვარესია, თუმცა მისი დამატება მარტივი არ იქნება. ატლეტიკო მადრიდი არგენტინელ ფორვარდს დაახლოებით €150 მილიონად აფასებს, რასაც სხვა კლუბების სერიოზული ინტერესიც ემატება.
დეკუს სიაში სხვა ფორვარდებიც არიან — ომარ მარმუშის მიმართ ინტერესი რეალური და დადასტურებულია. ბარსელონაში ფიქრობენ, რომ ეგვიპტელი შემტევი გუნდს სერიოზულად გააძლიერებს. ინფორმაციისთვის იმასაც გეტყვით, რომ მანჩესტერ სიტი ომარ მარმუშს დაახლოებით €60/70 მილიონად აფასებს.
ბარსელონა ვიქტორ ოსიმენითაც სერიოზულად ინტერესდება, თუმცა ამ მომენტისთვის უცნობია ნიგერიელი ფორვარდი ზაფხულში გალათასარაის დატოვებს თუ არა. 27 წლის ფორვარდის სატრანსფერო ფასი €90/100 მილიონია.
რაც შეეხება მარკუს რაშფორდსა და რობერტ ლევანდოვსკის — ბარსელონა ინგლისელი შემტევის გამოსყიდვაზე უკვე მუშაობს და ბოლო მომენტში რაიმე გაუთვალისწინებელი თუ არ მოხდა, 28 წლის ფეხბურთელი გუნდში დარჩება. პოლონელი ფორვარდის საკითხი კი თითქმის გადაწყვეტილია და როგორც იწერება, კატალონიური კლუბი ამ მომენტისთვის ვეტერანი ფორვარდის შენარჩუნებას არ გეგმავს.
ზაფხულის სატრანსფერო ფანჯრის მოახლოებასთან ერთად, ბარსელონას პოტენციურ ტრანსფერებზე უფრო მეტი ინფორმაცია გახდება ცნობილი.
