უნიონ სენ ჟილმა 1934/35 წლების სეზონის შემდეგ, ბელგიის ჩემპიონობა პირველად იზეიმა. "იუნიონისტებმა" ამ ტიტულის მოგებით ჩემპიონთა ლიგის საგზურიც მოიპოვეს. უნიონ სენ ჟილის ღირსებას იცავს ქართველი მეკარე გიორგი ყავლაშვილიც, რომელიც სულ რაღაც 18 წლისაა და პირველ გუნდში ამ სეზონში დააწინაურეს.
LaGazzetta.ge-სთან ექსკლუზიურ ინტერვიუში საქართველოს 19-წლამდე ნაკრების ფეხბურთელმა საინტერესო თემებზე ისაუბრა.
- შენი ბელგიური თავგადასავლის შესახებ მოგვიყევი —წლების განმავლობაში 3 დიდ საფეხბურთო აკადემიაში ვარჯიშობდი (ანტვერპენი, ვესტერლო და უნიონ სენ ჟილი).
- დავიწყე ანტვერპენში, სადაც შვიდი წელი ვითამაშე. თავიდან მოედნის მოთამაშე ვიყავი და კარგადაც გამომდიოდა კიდევაც თამაში, მაგრამ ასევე ძალიან მხიბლავდა მეკარის პოზიციაც. ერთ-ერთი თამაშის დროს კლუბის მენეჯერმა შეამჩნია ჩემი ნიჭი და მას შემდეგ სპეციალური მეკარის ვარჯიშები დამინიშნეს. რამდენჯერმე საერთარიშორისო ტურნირებზე საუკეთესო მეკარის პრიზიც კი ავიღე. შემდეგ ვესტერლოში გადავედი, სადაც ორი სეზონი გავატარე, იქ უფრო მეტს ველოდი, მაგრამ ისე არ გამოვიდა როგორც მე წარმომედგინა, ამიტომაც გადავედი უნიონში, სადაც ძალიან კარგი პირველი სეზონი მქონდა. დიდ შედეგი და მუშაობა დავდე, რაც შეუმჩნეველი არ დარჩა და პროფესიულ ფეხბურთში პირველი ნაბიჯების გადადგმა შევძელი.
- რას გამოარჩევდი ბელგიურ საფეხბურთო აკადემიებიდან. ვარჯიშების სტილი, მწვრთნელებთან ურთიერთობა და ზოგადად, როგორია ბელგიური საფეხბურთო სამყარო, როდესაც საქმე აკადემიასა და ბავშვებს ეხება.
- ბელგიაში თამაშის სტილი ძალიან ტექნიკური და ტაქტიკურია. ჩვენგან მოელიან, რომ კარგად გავიგებთ თამაშს და არა მხოლოდ ბრძანებებს შევასრულებთ. აქ გაცილებით მეტი მრავალფეროვნებაა, რადგან ხვდები სხვადასხვა ეროვნების მოთამაშეებს და ყველას თავისი იდენტობა და სტილი აქვს. საქართველოში ხედავთ ძლიერ, საერთო ქართულ იდენტობას. ბელგიაში ასევე დიდი ყურადღება ექცევა სკოლაში შენს ნიშნებს და განსაკუთრებით შენს ქცევას. კლუბი კონტაქტს ამყარებს სკოლასთან და მუდმივი ყურადღების ქვეშ ხარ.
- 2024 წლიდან მოყოლებული უნიონ სენ ჟილში ირიცხები, საიდანაც უკვე პირველ გუნდში მოხვდი. მოგვიყევი გუნდის შესახებ უფრო მეტი.
- უნიონი სენ ჟილი განსაკუთრებული და ერთ-ერთი უძველესი კლუბია ბელგიაში. 90 წლის შემდეგ კლუბი მეთორმეტეჯერ გახდა ბელგიის ჩემპიონი. მას შემდეგ, რაც აქ ვარ, თავს ნამდვილად სახლში ვგრძნობ. კლუბს აქვს მკაფიო ხედვა და დიდი ამბიცია, რაც მას იდეალურ ადგილად აქცევს ჩემი ზრდისთვის. ჯგუფი ამბიციურია, მაგრამ ასევე ძალიან მხარდამჭერი. ბევრს ვსწავლობ გამოცდილი მოთამაშეებისგან და მეც მენდობიან. დონე მაღალია, და ეს მაძლევს მოტივაციას, რომ ყოველდღე გავაუმჯობესო ჩემი თამაში.
- 1934/35 სეზონის შემდეგ, გუნდმა ჩემპიონობა პირველად იზეიმა. რა გრძნობაა ასეთ პატარა ასაკში ტიტულის მოგება და როგორ შეხვდნენ ფანები ჩემპიონობას?
- ეს მართლაც წარმოუდგენელი იყო. გულშემატკივრები შესანიშნავები იყვნენ; მთელი სტადიონი ემოციებისგან კანკალებდა. ნამდვილად გრძნობდი, რომ ეს უბრალოდ ტიტულზე მეტი იყო. წინა სეზონებში კლუბი ვერ ახერხებდა ტიტულების მოგებას და ახლა, 90 წლის შემდეგ, ეს ხანგრძლივი უტიტულო პერიოდი საბოლოოდ დასრულდა. მადლიერი ვარ, რომ შევძელი ამის ნაწილი ვყოფილიყავი.
- გუნდი ჩემპიონთა ლიგაზე იასპარეზებს — ეს საკმაოდ დიდი გამოწვევაა როგორც შენთვის, ისე კლუბისთვისაც. ამის შესახებ რას გვეტყოდი?
- ეს კლუბის ყველა წევრისთვის ოცნების ახდენაა. მოუთმენლად ველი იმის გარკვევას, თუ რომელ გუნდებთან მოგვიწევს თამაში. გულშემატკივრებისთვის ეს წარმოუდგენელი მომენტია. ჩემპიონთა ლიგას უნიკალურ ატმოსფერო მოაქვს, რომელსაც სხვაგან ვერსად ნახავთ. ჩვენთვის, როგორც გუნდისთვის, ეს შესანიშნავი შესაძლებლობა და ამავდროულად დიდი გამოწვევაა. ეს იქნება ფანტასტიკური გამოცდილება ევროპაში უმაღლეს დონეზე თამაშის. ძალიან ბედნიერი ვარ, რომ მაქვს შანსი, პირველ გუნდთან ერთად ჩემპიონთა ლიგაზე ვითამაშო, თუნდაც სათადარიგოთა სკამიდან, და ამავდროულად 19-წლამდელთა გუნდთან ერთად ახალგაზრდულ ლიგაზეც ვიასპარეზო.
- კლუბთან არსებული კონტრაქტი 2028 წლამდე გაკავშირებს. ხომ არ იგეგმება შენი იჯარით სხვა გუნდში გადასვლა თუ მომდევნო სეზონშიც უნიონის ღირსებას დაიცავ? რა გეგმები აქვთ კლუბში?
- ამჟამად, ჩემი ერთადერთი ფოკუსი უნიონი და საქართველოს ეროვნული ნაკრებია. უნიონში ორი შესანიშნავი მეკარის მწვრთნელი მყავს, ნილს ჰერმანსი და იოს ბეკქსი, რომლებიც პერსონალურად მავარჯიშებენ და მეხმარებიან პროგრესში. პროექტი და ჩემი ამჟამინდელი ამბიციაა უნიონში მაღალი ხარისხის მეკარედ ჩამოვყალიბდე.
- საქართველოს 17 და 18-წლამდე ნაკრების წევრი იყავი, ახლა კი 19-წლამდე ნაკრებში გამოგიძახეს. ნაკრების სამომავლო მატჩებზე, რომ ვისაუბროთ.
- ყოველთვის დიდი პატივია ჩემი ქვეყნის წარმომადგენლობა. 19 წლამდელთა ნაკრებში დაწინაურება კიდევ ერთი საფეხურია. გუნდი ძალიან ძლიერი გვყავს. ახლა ამხანაგურ მატჩებს ვთამაშობთ, გუნდური სულისკვეთებისა და ჩვენი თვისებების გასაუმჯობესებლად.
- ხორვატია, სერბეთი, გიბრალტარი—ამ მეტოქეებზე რისი თქვა შემიგიძლია და რა მიზანი აქვს ნაკრებს ამ ჯგუფში?
- ჩვენი მიზანია, მაქსიმალურად გამოვიყენოთ ეს შესარჩევი მატჩები. ყველა თამაშს გამარჯვებისთვის ვთამაშობთ. ჩვენზეა დამოკიდებული, რომ საქართველო მაღალ, პროფესიონალურ დონეზე წარმოვადგინოთ. ეს შანსი ხელიდან არ უნდა გავუშვათ.
