"წითლების" თავდამსხმელის კიდევ ერთი უნიკალური მიღწევა - ოლდ ტრაფორდზე გოლი პრემიერ ლიგის ზედიზედ ოთხ გასვლით შეხვედრაში. ერთი სიტყვით, "მანკუნიანელებსა" და 31 წლის ფორვარდს ერთმანეთთან არაერთი მოგონება აკავშირებთ. 2017 წელს, მისი გადმოსვლის დღეს, ალბათ ვერავინ წარმოიდგენდა, რომ "ოცნებათა თეატრის" მთავარ ღამის კოშმარად სწორედ ის იქცეოდა.
მანჩესტერისა და ენფილდელების დაპირისპირებაში ყველაზე მეტი, 14 გოლი, სწორედ "ფარაონს" აქვს გატანილი. ზოგადად, მასზე მეტი ბურთი ამ გუნდის კარში მხოლოდ ლეგენდარული ჯიმი გრივზის ანგარიშზეა. მას გატანილი აქვს 15 გოლი, შემდეგ კი 14-14 ბურთით ლივერპულის მე-11 ნომერი და გრემ შარპი მოდიან.
სალაჰისთვის იუნაიტედი ყველაზე "სასურველი" მოწინააღმდეგეა. ყველაზე მეტი გოლი თავისი კარიერის განმავლობაში მან სწორედ ამ გუნდს გაუტანა. როგორც აღვნიშნეთ, ეგვიპტელმა ფორვარდმა "წითელი ეშმაკების" კარი 14-ჯერ აიღო, შემდეგ მოდიან მანჩესტერ სიტი, ტოტენჰემი და ვესტ ჰემი, 11 ბურთი სამივეს.
ისმის კითხვა - შეძლებს თუ არა მოჰამედი "მანკუნიანელების" წინააღმდეგ თავისი შედეგების გაუმჯობესებას? ჯერჯერობით გაურკვეველია, რადგან მერსისაიდელთა ფორვარდის მომავალი ბურუსით არის მოცული. მისი ხელშეკრულება გათვლილია 2025 წლამდე, კლუბი ითხოვს გახანგრძლივებაზე თანხმობას, მაგრამ თავად მოთამაშე ჯერჯერობით დუმს.
როგორც ცნობილია, მიმდინარე სეზონის ბოლოს "წითლებს" დატოვებს იურგენ კლოპი - მწვრთნელი, რომელმაც 31 წლის თავდამსხმელი თავის საუკეთესო კონდიციამდე მიიყვანა. "ფარაონი" ჯერჯერობით სკეპტიკურად უყურებს ენფილდურ პერსპექტივებს გერმანელი ტაქტიკოსის გარეშე და გაურკვეველია, თუ რა შეაცვლევინებს აზრს.
ამის გარდა, ლივერპულის მეთერთმეტე ნომრით დაინტერესებულები არიან საუდის არაბეთის კლუბები, რომლებიც მისი ტრანსფერისთვის ფულს ნამდვილად არ დაიშურებენ. რამდენიმე კვირის წინ, ეგვიპტის ეროვნული გუნდის ყოფილმა ფორვარდმა, აჰმედ ჰოსამ მიდომ განაცხადა, რომ სალაჰმა ერთ-ერთ არაბულ კლუბთან წინასწარ შეთანხმებას უკვე მიაღწია. მომავალ ზაფხულს საბოლოოდ გაირკვევა, მოშორდება თუ არა "ოცნებათა თეატრს" ეგვიპტური კოშმარი.
