27 წლის ფეხბურთელი რუბენ ამორიმის გეგმებში არ შედის, რაც ინგლისელმა კარგად იცის და მისი აგენტი ახალ გუნდს უკვე რამდენიმე კვირაა რაც ეძებს. რაშფორდის დამატების სურვილი საუდის კლუბებმა უკვე გამოთქვეს, თუმცა ფეხბურთელს ევროპის დატოვება ჯერჯერობით არ სურს. ბოლო კლუბი კი რომელიც ფეხბურთელს დაუკავშირეს მილანია!
ფეხბურთელი იტალიურ გრანდს შუამავლებმა შესთავაზეს და იმის ფონზე, რომ "როსონერი" იანვარში შემტევის დამატებას განიხილავს, არის შანსი რაშფორდი სერჟიო კონსეისაუსთვის საინტერესო კანდიდატურა იყოს. მილანის მენეჯმენტში ასევე მუშაობს ზლატან იბრაჰიმოვიჩიც, რომელიც წლების წინ მარკუსის თანაგუნდელი იყო მანჩესტერ იუნაიტედში და როგორც ცნობილია, ამ ორ ადამიანს საკმაოდ კარგი ურთიერთობა აქვთ.
მაგრამ აქ ვხვდებით ერთ დიდ პრობლემას, რომლესაც რაშფორდის წლიური ხელფასი ჰქვია — ფეხბურთელის ანაზღაურება წელიწადში დაახლოებით €15 მილიონია, რაც არა მარტო მილანისთვის, არამედ სხვა დაინტერესებული კლუბებისთვისაც დიდ პრობლემას წარმოადგენს. "როსონერი" ფეხბურთელის მხოლოდ იჯარით დამატებას განიხილავს, ხოლო რაც შეეხება რაშფორდის ხელფასს, განიხილება მხოლოდ ნაწილის გადახდა. ასეთ გარიგებაზე დიდი შანსია მანჩესტერი თანახმა იყოს, რადგან ფეხბურთელის გაშვება უნდათ.
მარკუს რაშფორდის პოტენციურ ტრანსფერთან დაკავშირებით უფრო მეტი ინფორმაცია უახლოეს დღეებში გახდება ცნობილი. მოსალოდნელია სხვა კლუბების გააქტიურებაც.
