ამ მარცხის შემდეგ, არგენტინელებმა თავისი ნაკრები გააკრიტიკეს და გული აიცრუეს, თუმცა 8 წლის შემდეგ, ლეო მესიმ თავის თანაგუნდელებთან ერთად ქვეყანას ოცნება აუსრულა და მუნდიალი მაინც მოიგო, როცა ფინალში საფრანგეთის ნაკრები დრამატულ ბრძოლაში დაამარცხა.
"მე და ჩემმა თანაგუნდელებმა მივიღეთ დიდი კრიტიკა, რასაც არ ვიმსახურებდით. გასაგებია, რომ მსოფლიო ჩემპიონობა საოცარი მიღწევაა, მაგრამ იმ დროს, საკმაოდ კარგი ნაკრებით მსოფლიო ჩემპიონატის ფინალში გავედით და კოპა ამერიკის ფინალი 2-ჯერ ვითამაშეთ, რაც ასევე კარგი შედეგია.
როგორც აღვნიშნე, 2014 წელს ბრწყინვალე ნაკრები გვყავდა, კარგი დრო გავატარეთ და შედეგებიც კარგი გვქონდა. რა თქმა უნდა, ასეთ დროს ჩემპიონობით დაგვირგვინება დამატებით მუხტს იძლევა, მაგრამ იმ ეტაპზე ეს არ გამოვიდა.
კრიტიკას არ ვიმსახურებდით და შესაბამისად, ამ ყველაფრის მიმართ ყოველთვის გულგრილი ვიყავი. დიდ ყურადღებას ჩემი ოჯახის წევრები უფრო აქცევდნენ, რომლებიც ამ თემებთან ყველაზე ახლოს იყვნენ.
ხალხის და ჟურნალისტების მიზანი იყო არგენტინის ნაკრები ცუდად გამოეყვანათ, მიწასთან გაესწორებინათ, რათა მათი რეიტინგი და თამასა უფრო აწეულიყო. კარგია, რომ დღეს ეს ყველაფერი შეიცვალა და ტრიუმფალური გამარჯვების შემდეგ, ჩვენდამი ყველას დამოკიდებულება დადებითია", - განაცხადა მესიმ.
