ლუკა მოდრიჩისთვის მადრიდული ისტორია მიმდინარე სეზონში დასრულდა. ხორვატმა ვეტერანმა ფეხბურთელმა რეალ მადრიდი 13 წლის შემდეგ დატოვა და თავისუფალი აგენტი გახდა. ბევრი ვარაუდობდა, რომ 39 წლის ნახევარმცველი საფეხბურთო კარიერას დაასრულებდა, თუმცა როგორც ირკვევა, მოდრიჩი ამაზე ჯერ არ ფიქრობს — მისი მიზანი 2026 წლის მსოფლიო ჩემპიონატზე თამაშია.
სად გააგრძელებს ლუკა მოდრიჩი საფეხბურთო კარიერას?
სულ რამდენიმე წუთის წინ გავრცელებული ინფორმაციის თანახმად, ლუკა მოდრიჩს მილანიდან დაუკავშირდნენ! იტალიური კლუბის სპორტული დირექტორი იგლი ტარე პირადად დაუკავშირდა ვეტერან ხორვატს, სადაც მხარეებმა პოტენციურ ტრანსფერზე ისაუბრეს. როგორც ირკვევა, იტალიურ გუნდს ფეხბურთელის დამატება ძალიან სურს.
მილანში დიდი ცვლილებები დაანონსდა, მოსალოდნელია, რომ გუნდს ბევრი ფეხბურთელი დატოვებს, შესაბამისად, "როსონერის" წინ საკმაოდ დატვირთული ზაფხულის სატრანსფერო ფანჯარა ელოდება.
ლუკა მოდრიჩი საბოლოო გადაწყვეტილების მიღებას ჯერ არ ჩქარობს, რადგან მის დამატებას რამდენიმე კლუბი ცდილობს. განიხილება MLS-ისა და საუდის კლუბების ვარიანტებიც.
უახლოეს კვირებში, ლუკა მოდრიჩის მილანში პოტენციურ ტრანსფერთან დაკავშირებით უფრო მეტი ინფორმაცია გახდება ცნობილი.
