რივერ პლეიტის ყოფილმა სკაუტმა, დანიელ ბრისუელამ ისაუბრა რეალ მადრიდის ახალწვეულ გარემარბზე, ფრანკო მასტანტუონოზე. არგენტინელი სელექციონერის თქმით, "სამეფო კლუბის" ვინგერს ეროვნულ გუნდში ლეო მესის ადგილის დაკავება შეუძლია.
"მასტანტუონო თამაშის სტილით ევროპელ ფეხბურთელს ჰგავს. ის არის ნიჭიერი, მშრომელი და რეალისთვის შექმნილი მოთამაშე. დარწმუნებული ვარ, ფრანკო 2026 წლის მუნდიალზეც ითამაშებს. 17 წლის ასაკში ის უკვე რივერის სრულფასოვან ლიდერად მოგვევლინა. წარმოიდგინეთ, როგორი იქნება არგენტინელი ვინგერი 2 წელში.
მადრიდელთა გარემარბს არგენტინის ნაკრებში მესის მემკვიდრედ ვხედავ. ის არის ელეგანტური დირიჟორი, როგორიც თავის დროზე ზიდანი იყო. საფეხბურთო მოედანს 17 წლის ვინგერი როგორც ჭადრაკის დაფას, ისე უყურებს."
