ხვალ, 7 აპრილს, თბილისის დროით 23:00 საათზე, ჩემპიონთა ლიგის 1/4 ფინალური ეტაპის ორი მატჩი გაიმართება — მაყურებელს რეალ მადრიდი-ბაიერნისა და სპორტინგი-არსენალის შეხვედრები ელოდება.
ბაიერნი ამ მატჩს თითქმის ოპტიმალური შემადგენლობით ხვდება, თუმცა მატჩამდე რამდენიმე საათით ადრე ბოლომდე გარკვეული არაა ჰარი კეინის საკითხი. როგორც მოგეხსენებათ, ინგლისელმა ფორვარდმა მარტის სანაკრებო პაუზის დროს მუხლის ტრავმა მიიღო, რის გამოც რამდენიმე ვარჯიშის გამოტოვება მოუწია.
ბოლო საათებში გავრცელებული ინფორმაციის თანახმად, ჰარი კეინმა დღეს გუნდთან ერთად მსუბუქად ივარჯიშა და საკმაოდ დიდი შანსია ხვალ სამატჩო განაცხადშიც მოხვდეს. ვენსან კომპანი იმედოვნებს, რომ გამოცდილი ინგლისელი ფეხბურთელი რეალ მადრიდს პირველივე წუთიდან შეუტევს, თუმცა განიხილება 32 წლის ფეხბურთელის სათადარიგოთა სკამზე დატოვებაც.
ბაიერნთან დაახლოებულ წყაროებს თუ დავუჯერებთ, ჰარი კეინის საკითხი დღის ბოლომდე გადაწყდება, თუმცა ერთი რამ უკვე ცნობილია, ინგლისელ ფორვარდს რეალ მადრიდთან თამაში სურს და ამისთვის ყველაფერს გააკეთებს.
