მანჩესტერ იუნაიტედის 2017-2018 წლების სეზონი - 19-ქულიანი ჩამორჩენა პრემიერ ლიგაში ჩემპიონ მანჩესტერ სიტისთან და მარცხი ჩემპიონთა ლიგის 1/8 ფინალში სევილიასთან. "წითელ ეშმაკებს" იმ დროს ხელმძღვანელობდა ჟოზე მოურინიო, რომელიც პერიოდულად ხდებოდა კრიტიკის ობიექტი, ისევე როგორც მისი შეგირდებიც.
საინტერესოა, რომ იმ შემადგენლობის შვიდი ფეხბურთელი ოლდ ტრაფორდის დატოვების შემდეგ, სერია ა-ს ჩემპიონი გახდა. ჰენრიხ მხითარიანი, რომელუ ლუკაკუ, ალექსის სანჩესი, მატეო დარმიანი, ეშლი იანგი - აღნიშნულმა ხუთეულმა სკუდეტო მილანის ინტერის რიგებში მოიგო.
ამის გარდა, სომეხმა გამთამაშებელმა და იტალიელმა მარჯვენა მცველმა "ნერაძურისთან" ერთად ითამაშეს ჩემპიონთა ლიგის ფინალში და რამდენიმე დღეში მათ კიდევ ერთი ფინალი ელით. რაც შეეხება ბელგიელ ფორვარდს, ის არ შემოფარგლულა სკუდეტოს მოგებით მხოლოდ მეაცას ბინადრებთან ერთად და ცოტა ხნის წინ, იტალიის ჩემპიონატის ტრიუმფატორი ნაპოლიშიც გახდა.
"პარტენოპეის" თავდამსხმელს სერია ა-ს ჩემპიონობაში დაეხმარა მოურინიოს იმდროინდელი შემადგენლობის კიდევ ერთი წევრი, სკოტ მაკტომინეი, რომელიც კალჩოს მიმდინარე სეზონის მთავარ აღმოჩენად იქცა. მის ანგარიშზე არის 13 გატანილი ბურთი 36 შეხვედრაში, ასეთი შედეგიანი შოტლანდიელი შუახაზელი არასდროს ყოფილა.
ბოლოს კიდევ ერთი საინტერესო დეტალი - მანჩესტერის დატოვების შემდეგ, სერია ა-ს ჩემპიონი ვეტერანი ზლატან იბრაჰიმოვიჩიც კი გახდა. დიახ, შვედ ფორვარდს სკუდეტო მოუგია წარსულშიც, მაგრამ ფაქტია, მხითარიანის, ლუკაკუს, სანჩესისა და დანარჩენების მსგავსად, მან ეს იუნაიტედიდან წასვლის შემდეგაც გააკეთა.
