2018 წელს საფრანგეთის ნაკრები მეორედ თავის ისტორიაში მსოფლიო ჩემპიონი გახდა. ის შემადგენლობა სავსე იყო ვარსკვლავებით, მათ შორის უკანახაზშიც, სადაც ბრწყინავდა ცენტრალური მცველების ახალგაზრდა დუეტი: რაფაელ ვარანი მადრიდის რეალიდან და სამუელ უმტიტი ბარსელონადან.
იმ დროს ვერავინ წარმოიდგენდა იმ ფაქტს, რომ სულ რაღაც შვიდი წლის შემდეგ, ფრანგი უკანახაზელები ყოფილი ფეხბურთელების სტატუსით იქნებოდნენ. გასული სეზონის სტარტზე, კარიერა დაასრულა "სამეფო კლუბის" ექს-მცველმა, წელს კი ფეხბურთიდან კატალონიელთა ყოფილი უკანახაზელიც წავიდა.
ხშირი ტრავმიანობა და მოტივაციის ნაკლებობა - სწორედ ეს არის ვარანისა და უმტიტის ჩაქრობის მიზეზი. პირველმა მათგანმა 25 წლის ასაკისთვის მოიგო ყველაფერი რაც კი შეიძლებოდა, შემდეგ კი იყო თამაშის ხარისხის დავარდნა, შეცდომები, ისევ და ისევ ტრავმები. რაფას ბოლო გაჩერება იყო კომო, რომლის რიგებში მან 1 არასრული შეხვედრა ჩაატარა.
რაც შეეხება სამუელს, "ბლაუგრანადან" წასვლის შემდეგ, მან სცადა კარიერის რეანიმირება ლილსა და ლეჩეში, თუმცა უშედეგოდ. მათი კარიერის პიკი იყო ერთ დროს, გასული დეკადის მე-2 ნახევარში, ჩაქრობა და ფეხბურთიდან წასვლა ასევე ერთ დროს მოხდა.
