გავრცელდა ფოტოები, რომელზეც კევინ დე ბრუინი ნაპოლიში 10-ნომრიანი მაისურით ვარჯიშობს. შეგახსენებთ, რომ აღნიშნული ნომერი დიეგო მარადონას საპატივცემულოდ "პარტენოპეიმ" 2000 წელს გამოყენებიდან ამოიღო. როგორც გაირკვა, ბელგიელი ფლეიმეიქერი 10-ნომრით ივარჯიშებს მხოლოდ პრესეზონზე, შემდეგ კი 11-ნომერს მოირგებს.
ამ თემამ მოგვცა საფუძველი გაგვეხსენებინა ის ფეხბურთელები, რომლებმაც "აძურიში" ათიანით არგენტინელი შემტევის წასვლის შემდეგ ითამაშეს. ნაპოლის ლეგენდარული ფლეიმეიქერის წასვლიდან - 10 ნომრის გაუქმებამდე, ანუ 2000 წლამდე, ეს ნომერი მოირგეს ჯანფრანკო ძოლამ, მასიმო მაურომ, რობერტო პოლიკანომ, იონას თერნმა, რენატო ბუსომ, ეუგენიო კორინიმ, ბენი კარბონემ, კარმელო იმბრიანიმ, ფაუსტო პიციმ, ბეტო მარტინსმა, იგორ პროტიმ და კლაუდიო ბელუჩიმ.
21-ე საუკუნის დასაწყისში "პარტენოპეიში" დაიწყო კრიზისი, რის გამოც ეს გუნდი სერია C1-მდე დაქვეითდა. იტალიის ქვედა ლიგაში მოქმედებდა ფეხბურთის ძველი წესი: მოედანზე გამოსული მოთამაშეები უნდა ყოფილიყვნენ კლასიკური ნუმერაციით, 1-დან - 11-მდე, სათადარიგოთა სკამზე მყოფები კი 12-დან - 22-მდე.
აღნიშნული წესის გამო, ათიანის ტარების ბედნიერება ხვდა წილად "აძურის" რამდენიმე ფეხბურთელს - ემანუელე ბერეტონის, მარიანო ბოლიაჩინოსა და რობერტო სოსას. სან პაოლოს ბინადრების სერია ბ-მდე აღზევების შემდეგ, 10-ნომერი აღნიშნულ კლუბში აღარავის მოურგია.
