მილანში ახალი სეზონისთვის აქტიურად ემზადებიან. როგორც იტალიური პრესა იუწყება, "როსონერიში" დიდი ცვლილებები მოხდება და არსებული შემადგენლობა ძირეულად შეიცვლება. გუნდი უკვე დატოვა ტიჯანი რეინდერსმა, ხოლო შემდეგი ფეხბურთელი რომელიც მილანიდან წავა დიდი ალბათობით ტეო ერნანდესი იქნება, თუმცა, შემადგენლობის გადახალისება აქ არ დასრულდება. მილანს მიმდინარე სატრანსფერო ფანჯრის დროს დაახლოებით 15 ფეხბურთელი კიდევ დატოვებს.
რაც შეეხება ახალ ტრანსფერებს, "როსონერი" ლუკა მოდრიჩის გარდა 7-8 ფეხბურთელს კიდევ დაიმატებს. მასიმილიანო ალეგრის მოთხოვნით, თავიდან ბოლომდე შეიცვლება ნახევარდაცვის ხაზი, შესაბამისად, უფროსობა მინიმუმ ორ ნახევარმცველს კიდევ შეიძენს.
ლუკა მოდრიჩის შემდეგ, იტალიური გრანდი ხავი გერასა და გრანიტ ჯაკას დამატებას შეეცდება. კლუბის სპორტული დირექტორი იგლი ტარე როგორც ესპანელის, ისე შვეიცარიელის გარიგებაზე უკვე რამდენიმე დღეა, რაც მუშაობს. ვალენსია 22 წლის შუახაზელს დაახლოებით €25-30 მილიონად აფასებს, ხოლო ლევერკუზენი გამოცდილი ფეხბურთელის სანაცვლოდ €15 მილიონამდე ითხოვს. მილანი ამ ორი ტრანსფერის დახურვას უახლოეს ორ კვირაში გეგმავს. მილანში ხავი გერასა და გრანიტ ჯაკას გარდა სამუელე რიჩის და არდონ ჯაშარის კანდიდატურებსაც განიხილავენ.
რაც შეეხება ახალ ფორვარდს, მას შემდეგ, რაც მილანი ლუკა იოვიჩმა და ტამი აბრაჰამმა დატოვეს, მაქს ალეგრიმ ახალი შემტევის დამატება მოითხოვა. როგორც რამდენიმე დღის წინ გაცნობეთ, ფორვარდის პოზიციაზე რამდენიმე კანდიდატურა განიხილება, თუმცა როგორც ჩანს მთავარი სამიზნე დუშან ვლაჰოვიჩია. იუვენტუსმა 25 წლის სერბი ფორვარდი ტრანსფერზე დააყენა, მისი დამატება კი €25 მილიონის ფარგლებშია შესაძლებელი. მხარეებს შორის პირველი კონტაქტი უკვე შედგა, მეტიც, ვლაჰოვიჩი "როსონერიში" თამაშს სერიოზულად განიხილავს, რაც მილანს საქმეს ბევრად უმარტივებს.
მილანი ამ 3 ფეხბურთელის გარდა, ცენტრალური მცველის, მარჯვენა მცველის, მარცხენა მცველისა და ვინგერის დამატებასაც გეგმაბს. სან სიროს ბინადრებს წინ საკმაოდ დატვირთული სატრანსფერო ფანჯარა ელოდებათ.
