რამდენიმე დღის წინ დაწყებული მოლაპარაკებები დიდი შანსია საბოლოო შეთანხმებით ძალიან მალე დასრულდეს — ნ'გოლო კანტე ევროპაში დასაბრუნებლად ემზადება! დიახ, 34 წლის ფრანგი ფეხბურთელის ტრანსფერზე ფენერბაჰჩე მუშაობს და კლუბთან დაახლოებულ წყაროებს თუ დავუჯერებთ, მხარეები შეთანხმებასთან ძალიან ახლოს არიან.
ფენერბაჰჩეს ხელმძღვანელობა საუდიში რამდენიმე საათის წინ ჩაფრინდა, სადაც კანტესთან და მის აგენტთან შეხვედრა გაიმართა. როგორც იწერება, კლუბები ტრანსფერზე შეთანხმებას თუ მოახერხებენ, ფრანგი ფეხბურთელი თანახმაა კარიერა თურქეთის სუპერ ლიგაში გააგრძელოს.
შეგახსენებთ, ნ'გოლო კანტე სეზონის ბოლოს თავისუფალი აგენტი ხდება და ალ იტიჰადთან ხელშეკრულების გახანგრძლივება მის გეგმებში არ შედის, სწორედ ამიტომ გააქტიურდა ფენერბაჰჩეც. დომენიკო ტედესკოს გუნდი ყველაფერს აკეთებს, რომ გარიგება რაც შეიძლება მალე დაიხუროს. უახლოეს საათებში გამოცდილი ფრანგი ნახევარმცველის პოტენციურ ტრანსფერთან დაკავშირებით უფრო მეტი ინფორმაცია გახდება ცნობილი.
