La Gazzetta dello Sport Georgia-ზე პროგნოზების ლიგა ახალი სათამაშო კვირით გრძელდება. მონაწილეებს ამ უიქენდზეც შეუძლიათ წინასწარ განსაზღვრულ სპორტულ ღონისძიებებზე პროგნოზების გაკეთება.
მონაწილეთა მიერ გაკეთებული პროგნოზები ფასდება წინასწარ დადგენილი წესებით, რის შემდეგაც შედგება ლიდერბორდი, რომელიც ასახავს თითოეული მონაწილის შედეგებს.
მეოთხე ტურის პროგნოზების მიღება დაწყებულია და დასრულდება 2025 წლის 15 ნოემბერს 18:00 საათზე.
La Gazzetta dello Sport Georgia-ს პროგნოზების ლიგის მხარდაჭერია ნატახტარი.
რა უნდა გავითვალისწინოთ მეოთხე ტურის წინ?
საქართველო - ესპანეთი
ვილი სანიოლის გუნდის მორიგი დიდი გამოცდა "ფურია როხასთან" და ძალიან ცუდი სტატისტიკის გამოსწორების კიდევ ერთი შანსი. ჩვენი ეროვნული ნაკრები დინამო არენაზე ევროპის მოქმედ ჩემპიონს კიდევ ერთხელ დაუპირისპირდება, სადაც ბევრი რაღაც შეიძლება გაირკვეს.
იმის მიუხედავად, რომ ესპანეთის ნაკრები საკმაოდ შესუსტებული შემადგენლობით იქნება წარმოდგენილი, ლუის დე ლა ფუენტეს გუნდი მაინც აშკარა ფავორიტია. შეგახსენებთ, ესპანეთი ჩვენთან გამარჯვების შემთხვევაში, მსოფლიო ჩემპიონატის საგზურს ფაქტობრივად გაინაღდებს.
რაც შეეხება საქართველოს ეროვნულ ნაკრებს, ვილი სანიოლი ნოემბრის სანაკრებო მატჩებს საკმაოდ დიდი დანაკლისით ხვდება, რასაც გიორგი ქოჩორაშვილის დისკვალიფიკაციაც ემატება, რომელიც ესპანეთთან დაპირისპირებას გამოტოვებს.
ლაშა დვალი, ოთარ კაკაბაძე, ირაკლი აზაროვი, გიორგი ჩაკვეტაძე, გიორგი მიქაუტაძე და ა.შ. - ჩვენი ნაკრების დანაკლისი მართლაც, რომ სერიოზულია.
დიდი დანაკლისის ფონზე, ნოემბრის მატჩებს არც ისე კარგ ფორმაში ხვდებიან ნაკრების სხვა ლიდერებიც, შესაბამისად, ესპანეთის გამარჯვების შანსები კიდევ უფრო იზრდება.
იმის მიუხედავად, რომ ალექსანდრე იაშვილმა ვილი სანიოლს ნდობა გამოუცხადა, მაინც ჩნდება კითხვა, ფრანგი სპეციალისტი ბოლო მატჩებს ხომ არ ატარებს ეროვნულ ნაკრებთან ერთად?
ბევრი გულშემატკივირს აზრით, ვილი სანიოლმა საკუთარი თავი ამოწურა და სჯობს მომავალ წელს ეროვნული ნაკრები სხვა სპეციალისტმა ჩაიბაროს.ესპანეთთან და ბულგარეთთან მატჩების შემდეგ, დიდი შანსია ფრანგი სპეციალისტის თაობაზე ახალი ინფორმაცია გახდეს ცნობილი, სადაც უფრო გარკვევით გახდება ცნობილი, ვილი სანიოლი 2026 წელს ნაკრების მთავარ მწვრთნელად დარჩება თუ არა.
ახლა კი დავუბრუნდეთ 15 ნოემბერს გასამართ მატჩს. საქართველოსა და ესპანეთს საკმაოდ დიდი ისტორია აკავშირებთ, სადაც დიდი სენსაციებიც დაფიქსირებულა და გამანადგურებელი ანგარიშებიც.
ესპანეთმა ბოლო 5 მატჩიდან ხუთივე მოიგო და საქართველოს არც მეტი, არც ნაკლები 20 გოლი გაუტანა, რაც იმის თქმის საშუალებას გვაძლევს, რომ მომდევნო მატჩშიც ბევრ გატანილ გოლს უნდა ველოდოთ.
საქართველოს სავარაუდო შემადგენლობა: მამარდაშვილი, გოჩოლეიშვილი, გოგლიჩიძე, კაშია, ლოჩოშვილი, წიტაიშვილი, მექვაბიშვილი, კიტეიშვილი, ლომინაძე, კვარაცხელია, დავითაშვილი;
ესპანეთის სავარაუდო შემადგენლობა: სიმონი, პორო, კუბარსი, ჰაუსენი, კუკურეია, ზუბიმენდი, რუისი, მერინო, ტორესი, ოიარსაბალი, ლოპესი;
ჩვენი ვარაუდით, მაყურებელი ბევრ გატანილ გოლს იხილავს და არც ეს შეხვედრა გამოდგება მოსაწყენი. იმის გათვალისწინებთ, რომ ჩვენი ნაკრები ძალიან დიდი დანაკლისით ხვდება ამ მატჩს, ხოლო სტუმარ გუნდს მხოლოდ გამარჯვება ესაჭიროება, მოსალოდნელია, რომ ესპანეთი 90 წუთის განმავლობაში დიდ უპირატესობას მოიპოვებს და ყველა შექმნილი საგოლე მომენტის გამოყენებას შეეცდება. ვილი სანიოლი კი კონტრშეტევებზე ააწყობს სათამაშო გეგმას, რაც ჩვენი ნაკრებისთვის უცხო ნამდვილად არ იქნება.
იტალია - ნორვეგია
მიმდინარე სანაკრებო პაუზის ერთ-ერთი ყველაზე გამორჩეული მატჩი, სადაც მუნდიალის საგზური დევს სასწორზე.
მას შემდეგ, რაც "სკუადრა აძურა“ ჯენარო გატუზომ ჩაიბარა, იტალიას 4-მატჩიანი მოგებათა სერია აქვს და კარგ სათამაშო ფორმაშიც შევიდა. რაც შეეხება ნორვეგიას, ერლინგ ჰოლანდი და მისი გუნდელები საოცარ საკვალიფიკაციო ეტაპს ატარებენ და ჯგუფში 18 ქულით, პირველ ადგილს სრულიად დამსახურებულად იკავებენ. სტალე სოლბაკენის გუნდს 6-დან 6 მოგება აქვს და მუნდიალზე გასვლის მთავარი ფავორიტიც არის.
გუნდები ამ მატჩს დიდი დანაკლისით არ ხვდებიან და შეიძლება ითქვას, რომ ორივე ნაკრები ოპტიმალური შემადგენლობით იქნება წარმოდგენილი.
იტალიამ მიმდინარე საკვალიფიკაციო ეტაპი ლუჩანო სპალეტისთან ერთად დაიწყო, რაც როგორც შემდგომში გაირკვა, უდიდესი შეცდომა იყო. გამოცდილმა სპეციალისტმა "სკუადრა აძურას" პროგრესს ხელი ვერ შეუწყო და პირიქით, მუნდიალზე გასვლის შანსები თითქმის მოუკლა, თუმცა ყველასთვის გასაკვირად ჯენარო გატუზომ ყველა კრიტიკოსის გაჩუმება მოახერხა და იტალიისთვის ნანატრი მსოფლიო ჩემპიონატის საგზურისთვის ნაკრები ბრძოლაში დააბრუნა.
იტალიის სავარაუდო შემადგენლობა: დონარუმა, დი ლორენცო, გაბია, ბონჯორნო, კალაფიორი, ორსოლინი, კრისტანტე, ტონალი, ძაკანი, რეტეგი, რასპადორი;
ნორვეგიის სავარაუდო შემადგენლობა: ნილენდი, რიერსონი, აიერი, ჰეგემი, ვოლფე, ბობი, ბერგე, ბერგი, ნუსა, ჰოლანდი, ლარსენი;
იტალიელებს პირველ მატჩში განცდილი მძიმე მარცხი კარგდ ახსოვთ, სადაც ნორვეგიამ მეტოქეს არც მეტი, არც ნაკლები 3 უპასუხო გოლი გაუტანა, შესაბამისად, წინ ძალიან საინტერესო დაპირისპირება გველოდება.
ჩვენი ვარაუდით, მაყურებელი საკმაოდ გახსნილ შეხვედრას იხილავს და მოსალოდნელია, რომ ორივე გუნდი გოლის გატანას მოახერხებს.
ამ და სხვა მატჩებზე გააკეთე პროგნოზები “პროგნოზების ლიგაში”.
