ბარსელონასთვის ახალი სეზონი საკმაოდ კარგად დაიწყო. ჰანსი ფლიკის გუნდი ლა ლიგას 19 ქულით ლიდერობს, ხოლო რაც შეეხება ჩემპიონთა ლიგას, კატალონიელებმა პირველ ტურში ნიუკასლი დაამარცხეს, დღეს კი მათ სერიოზული გამოცდა ელოდებათ - ბარსელონა პარი სენ-ჟერმენს თბილისის დროით 23:00 საათზე დაუპირისპირდება.
გუნდის კარგი სათამაშო ფორმა მთავარი მწვრთნელის გარდა, ფეხბურთელების დამსახურებაც არის, ამ სტატიაში კი ყურადღებას მარკუს რაშფორდზე გავამახვილებთ, რომელმაც ახალი სეზონის ძალიან კარგად დაიწყო. 27 წლის ინგლისელი ფორვარდის ანგარიშზე 8 ჩატარებული მატჩია, ხოლო რაც შეეხება მის სტატისტიკას, რაშფორდმა 2 გოლის გატანა მოახერხა, რასაც 4 საგოლე გადაცემაც დაუმატა.
გავლენიან ესპანურ გამოცემებს თუ დავუჯერებთ, ჰანსი ფლიკს სეზონის ბოლოს მარკუს რაშფორდის გამოსყიდვა სურს და ამის შესახებ კლუბის უფროსობას უკვე აცნობა. ბარსელონას ფინანსური პრობლემების გათვალისწინებით ინგლისელის პირდაპირ ყიდვაზე საუბარი ჯერ ძალიან ადრეა, თუმცა მარკუს რაშფორდმა სეზონის ბოლომდე ტოპ დონეზე თამაში თუ გააგრძელა, კატალონიელები აუცილებლად გამონახავენ გზას მის შესანარჩუნებლად.
შეგახსენებთ, მარკუს რაშფორდი ბარსელონაში 1-წლიანი იჯარით თამაშობს, თუმცა "ბლაუგრანას" ინგლისელის მანჩესტერ იუნაიტედიდან გამოსყიდვა €30 მილიონად შეუძლია.
