ედინ ჯეკო ზამთრის სატრანსფერო ფანჯრის პერიოდში ფლორენციის ფიორენტინადან გელზენკირხენის შალკეში გადავიდა. გასულ უქმეებზე შედგა ბოსნიელი ფორვარდის დებიუტიც და უნდა ითქვას, რომ მან პირველივე შეხვედრაში რეკორდი დაამყარა. კაიზერსლაუტერნის კარის აღებით, "ლურჯების" შემტევი გახდა ყველაზე ასაკოვანი გოლის ავტორი გერმანიის მე-2 ლიგის ისტორიაში.
ფელტინს არენას ბინადრების ათიანი გოლის გატანის მომენტისთვის 39 წლის, 10 თვისა და 8 დღის იყო. აღსანიშნავია, რომ ვეტერანი თავდამსხმელის გამოჩენამდე, აღნიშნული მიღწევა 47 წლის მანძილზე ხელშეუხებელი იყო. წინა რეკორდი ეკუთვნის ჰელმუტ ჰალერს, რომელიც 1978/79 წლების სეზონში აუგსბურგის მაისურით ფრანკფურტის კარის აღების მომენტში 39 წლის, 7 თვისა და 4 დღის იყო.
ერთი სიტყვით, "თეთრ გედს" ნამდვილად ისტორიული დებიუტი გამოუვიდა. რაც შეეხება მირონ მუსლიჩის გუნდის სატურნირო მდგომარეობას, გერმანიის ქვედა დივიზიონში ჩატარებული 19 ტურის შემდეგ, ის 39 ქულით პირველ პოზიციაზე არის.
