უკვე დიდი ხანია, რაც იტალიელი თავდამსხმელები ტოპ გუნდებისთვის სატრანსფერო ბაზარზე სასურველები არ არიან. უკანასკნელი ასეთი იყო ანდრეა ბელოტი, რომელსაც 2017 წლის ზაფხულში მსურველების რიგი ედგა. ტორინოს შემადგენლობაში 38 შეხვედრაში გატანილი 28 ბურთის შემდეგ, იტალიელ ფორვარდს დიდ მომავალს უწინასწარმეტყველებდნენ.
"გრანატას" თავდამსხმელის ხელში ჩაგდებისთვის იბრძოდა არაერთი გუნდი, თუმცა ყველაზე რეალური პრეტენდენტი იყო ორი - მილანი და მანჩესტერ იუნაიტედი. იტალიური და ინგლისური კლუბები "გალოს" სანაცვლოდ ჩამოდიოდნენ 70 მილიონს, მაგრამ "ხარების" პრეზიდენტი, ურბანო კაირო 100-ს ითხოვდა.
იმ პერიოდში ფეხბურთში ძალიან ტრენდული იყო 100-მილიონიანი ტრანსფერები და იტალიელ პრეზიდენტს ეგონა, რომ ასტრონომიული თანხების გამომმუშავებელთა მატარებელს ისიც შეახტებოდა. დატრიალდა სრულიად საპირისპირო რამ: ოლიმპიკოს ბინადრების მე-9 ნომერი არავინ წაიყვანა, მისი თამაშის ხარისხი კი წლიდან წლამდე ეცემოდა.
ყველაფერი მივიდა იქამდე, რომ 2022 წელს, 100-მილიონიანი ბელოტი კაიროს კლუბიდან რომაში თავისუფალი აგენტის სტატუსით გადავიდა. იტალიელმა ფორვარდმა ვერ შეძლო "ჯალოროსიში" დამკვიდრება, მოგვიანებით კი ვერც ფიორენტინაში, კომოსა და ბენფიკაში. დღეს, მისი მომავალი ბუნდოვნად არის მოცული.
ანდრეა რჩება "ტბისპირელების" საკუთრებაში, თუმცა განათხოვრების წესით ის ლისაბონშია. საიჯარო ხელშეკრულება სრულდება 30 ივნისს, რის შემდეგაც ტორინოს ერთ დროს ვარსკვლავურ ფორვარდს "ბიანკობლუში" დაბრუნება მოუწევს. ვნახოთ, რა იქნება მისი შემდეგი გაჩერება.
