მიმდინარე სეზონის ერთ-ერთი მთავარი აღმოჩენა უდავოდ არის რაიან შერკი, რომელმაც 41 მატჩში უკვე მოასწრო 12 გოლის გატანა და 19 ასისტის გაფორმება. საინტერესოა, რომ ახალგაზრდა ფრანგმა ვინგერმა თავის კარიერაში ყველაზე მეტი საგოლე პასი (7) გიორგი მიქაუტაძეს გაუკეთა.
დიახ, ქართველმა თავდამსხმელმა ლიონის ოლიმპიკის გარემარბის გადაცემების შედეგად გატანილი გოლებით გადაასწრო ალექსანდერ ლაკაზეტსაც კი, რომელსაც 1 ბურთით ნაკლები აქვს. ეს ყველაფერი იმის გათვალისწინებით, რომ საქართველოს ეროვნული გუნდის ფორვარდმა 21 წლის ვინგერის გვერდით ვეტერან ფრანგ შემტევთან შედარებით 69 შეხვედრით ნაკლები ჩაატარა.
რონელების კაპიტანმა თავისი გუნდის მე-18 ნომერთან ჩაატარა 100 მატჩი, 24 წლის თავდამსხმელმა კი ჯერჯერობით მხოლოდ 31. ფრანგული ფეხბურთის ქომაგებს ჟერლანელთა 69-ე ნომრისა და შერკის დუეტი აგონებთ იმ ყველაფერს, რასაც ქარიმ ბენზემა და ჰატემ ბენ არფა 2000-იანების შუა პერიოდში აკეთებდნენ.
ფრანგი შემტევების დახმარებით, ლიონი ლიგა 1-ში დომინირებდა უბრალოდ უკონკურენტოდ, თუმცა სამწუხაროდ, მათმა დუეტმა დიდხანს ვერ იარსება. 2008 წელს, რონელთა ვინგერი გადავიდა მარსელის ოლიმპიკში, ერთი წლის შემდეგ კი წავიდა მისი მეწყვილეც, მადრიდის რეალში.
